Ilemali enhle i-cauliflower

21 Mar, 2019 - 00:03 0 Views
Ilemali enhle i-cauliflower

uMthunywa

Bongani Ndlovu

ABALIMI bakhuthazwa ukuthi balime i-cauliflower ngoba iyisilimo esingabalethela imali njalo iyaphangisa ukuvuthwa.

Ekhuluma loMthunywa uNkosazana Siphilisiwe Moyo ongumlimi uthe kuqakathekile ukuthi abalimi balime izilimo ezifana lalesi ngoba zincedisa ukuvuselela umnotho welizwe.

“I-cauliflower yisilimo esilimeka lula njalo esingathathi isikhathi ukuthi sivuthwe. Umlimi kumele asilime phakathi kwenyanga kaNhlolanja kusiya kuMfumfu ukuze athole isivuno esihle njalo silenzuzo emangalisayo.

“Isilimo lesi kasihluphi ngitsho ukulima, lesivandeni umlimi angasilima, okuqakathekileyo yikuthi umlimi asilime  ngendlela eqondileyo. Abalimi kufanele bananzelele umhlabathi lapho abazasilima khona. 

“Umhlabathi kumele ubebuthakathaka njalo uvumele ukuhamba kwamanzi lula. Nxa usilime kuhle isilimo lesi phakathi kwamalanga angu-75 kusiya kwangu-140 sungenelisa ukuba usivune,” kuchaza uNkszn Moyo.

Uqhubekele phambili wathi abalimi abalima i-cauliflower sokumele baqale ukwenza amalungiselelo njengoba ivuma kakhulu ngesikhathi somqando.

“Isilimo lesi senza kuhle kakhulu ngesikhathi somqando, ngesikhathi sokutshisa yebo umlimi sengasilima kodwa sandise ukuhlaselwa yimikhuhlane eminengi okungabangela ukuthi isivuno sehle.

UNkszn Moyo uthe i-cauliflower iyathuthukisa umlimi ngokwakhe njalo iyancedisa inhlabathi ukuthi ihlale ilamandla ayo.

“Abalimi bangalima i-cauliflower bangathuthukisa ilizwe ngoba ilomkambo omkhulu njalo omuhle, ingaletha imali yaphandle kwelizwe njalo igcine umhlabathi ulamandla ngoba uyabe susenza i-crop rotation yona enceda ukulondoloza umhlabathi ukuze uqhubeke uvundile,” kuphetha uNkszn Moyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds