uMthunywa
KUBUKEKA izowadlisa ngamapayipi amaqembu abalwa njengamakhulu e-England iLeicester City ehambela phezulu kulezinsuku.
ILeicester iqhubeke ngomjaho wayo omuhle kulisizini ngesikhathi ibhaxabula iNewcastle United nge 5-0 emdlalweni we-English Premier League obuseKing Power Stradium. Ngokunqoba lumdlalo, leli iqembu eliphekwa nguBrendan Rodgers, likhuphukele endaweni yesithathu ku-English Premier League, nanko selinqobe imidlalo emine, lahlulwa kowodwa.
EzikaRodgers zethuse abanengi kumaviki amabili edluleyo ngesikhathi zisehlula iTottenham Hotspurs nge 2-1 ekhaya, ekubeni bebekade belandela ngemva esigabeni sakuqala somdlalo. Ukuqhatshwa kukaRodgers njengomqeqetshi kubukeka kuyisinqumo esilethe umehluko kuleliqembu.
ILeicester iqede isizini edluleyo ilele kunombolo 9 kuligi yize ilabadlali abasezingeni eliphezulu okubalwa kubo uJames Maddison, Jamie Vardy kanye loYouri Tielemans.
Ukubuyelwa yifomu kweLeicester kungahle kuvuse idlabuzane kubalandeli bebhola likanobhutshuzwayo abanengi ngoba iqembu liqophe umlandu ngesizini ka-2015/16 likhala lemuka lesicoco seligi lisaphekwa nguClaudio Ranieri.
Ngesizini elandelayo, leliqembu ebeliphekwa uCraig Shakespeare, likhitshwe yi-Atletico Madrid kuma quarter-finals e-UEFA Champions League okwamangalisa abalandeli abanengi. Kuleyo minyaka bekusadlala uNgolo Kante oseyibamba kuChelsea, uRiyad Mahrez obuyelwa yifomu kuManchester City kulezi insuku kanye loDanny Drinkwater (Chelsea) obolekiswe kuBurnley engamdlalisiyo.
Yize, izinto zisahamba kahle kuLeicester, okwenza kubesobala ukuthi akuhambi ngendlela kumaqembu abalelwa kulawo abizwa ngokuthi yi-big six okukhona kuwo iManchester United, Tottenham Hotspurs, iChelsea kanye le-Arsenal. IManchester United, ehleli kabuhlungu kunombolo 11 ibamba iyayeka njengoba isiwine imidlalo emibili kweyisithupha.
IMan United ibambene leArsenal ngoMvulo ntambama lapho eziqede zingutshiki lobhanqa 1-1 enkundleni ye-Old Trafford.
Ukudlala kwaleli qembu sekudale ukuthi abanye abalandeli baveze izikhalazo zabo ngempumela engemihle.
IChelsea, ebeke amathemba ayo kuFranck Lampard, oyinkakha yeqembu, ayikabi lohambo oluhle njengoba umqeqetshi ethemba abadlali abancane kakhulu kulalabo abadala eqenjini.
Emidlalweni eyisikhombisa, iChelsea isanqobe imidlalo emithathu kuligi. Itshaywe kabuhlungu yiManchester United nge 4-0 e-Old Trafford isizini ivula.
URodgers useke wafaka iLiverpool kuChampions kumasizini adluleyo kanti nxa abadlali bakhe beqhubeka lokungezelela igiya kuligi, leli qembu lingahle liphinde libethuse abalandeli bebhola emhlabeni wonke.
Eminye impumela ye-English Premier League:
Sheffield United 0-1 Liverpool, Aston Villa 2-2 Burnley, Crystal Palace 2-0 Norwich City, Wolves 2-0 Watford, Bournemouth 2-2 West Ham United, Everton 1-3 Manchester City, Tottenham Hotspurs 2-1 Southampton, Chelsea 2-0 Brighton & Hove Albion, Leicester City 5-0 Newcastle United, Manchester United 1, Arsenal 1.
