uMthunywa
YiNtatheli kaMthunywa
ABAQEQETSHI bomdlalo webhola lenyawo abatshiye umkhuba wokudinga abadlali emadolobheni, baqale ukufinyelela ithalenta eligcwele emaphandleni.
Lokhu kubikwe ngunobhala weLitsheni Youth Academy, uThandolwenkosi Nyoni ngesikhathi ebabaza ubungcitshi obuphethwe ngabafana abasakhulayo abalolonga ngaphansi kwaleli ikolotshi lemidlalo eliseLupane, esabelweni seMatabeleland North.
Iqembu leli, elasungulwa ngomnyaka ka-2020 lilabadlali abaleminyaka yokuzalwa engaphansi kwe-19, 17 le 14.
Selivuke labaliqembu lokulandela enkundleni zeMat North ngokuchaya ibhola ngendlela encomekayo.
Isiphiwo esilabantwana abakulithimu sibonakala maviki wonke kumidlalo etshiyeneyo eziqintini zeLupane.
Ngenyanga kaMabasa, abafana beLitsheni Youth Academy ama-Under-19 afika ku-final yenkezo kaZibuse.
UNyoni uthe ithalenta libuzana amavuko enkambeni yabo nanko asekhona njalo amaqembu adlala kumaligi aphezulu emadolobheni asecupha abadlali babo.
Uthe ngendlela abadlali babo ababukhali ngayo enyaweni, akulamqeqetshi ongaswela ngitsho loyedwa umdlali wokuthenga.
“Kanti bahlaleleni abaqeqetshi be-Premier League bengathaphi abadlali eLupane?” nguNyoni lo ethumela umbuzo kubaqeqetshi.
“Sasungula iqembu salibiza ngokuthi yiLitsheni Youth Academy sijonge ukuthi sikhulise ithalenta labantwana kumdlalo wenguqu emangweni wakithi eLupane.
Silabadlali abasafunda esikolo abaleminyaka yokuzalwa engaphansi kwe-19.
Okwamanje silamaqembu amathathu, abalisa labo abaleminyaka engaphansi kwe-17 labaleminyaka engaphansi kwe-14.
“Sizibona silikolitshi lemfundo yezomdlalo wenguqu njalo sigxile ekwabeleni ulwazi ngalumdlalo lokukhulisa umdlali obumbekileyo, owenelisa ukudlala esazi ukuthi ibhola yindlela yokuziphilisa.
Kweliphambili sikhangelele ukuthi abadlali laba bathengwe ngamaqembu aku-Division One, lalawo aku-Premier Soccer League.”
Kubadlali babo, bakhona asebekhange amehlo amaqembu akumaligi aphezulu ngokutsho kukaNyoni.
“Kulabadlali bethu ababili asebebizwe ukuthi bayezama inhlanhla kuqembu leTalen Vision, abanye ababili babizwe kuZPC Hwange.
Lokhu kuyisitshengiselo sokuthi imisebenzi yabaqeqetshi bethu iyabonakala.”
Uthe kulisizini sebephatheke kumidlalo yobungane engu-18 njalo banqoba yonke.
“Silombono wokuthi sincedise abadlali bethu babonwe ngamanye amaqembu, ikakhulu lawo adlala edolobheni.
Inhloso yikuvulela abantwabethu amathuba okuthi baguqule impilo zabo.
“Siyazi ukuthi angeke kusuke bonke abadlali ngakho silohlelo lokuthi sibumbe iqula labadlali elizenelisa ukungena kunkundla zeZifa Division Two esabelweni seMatabeleland North,” kutsho uNyoni.
UNyoni uthe iqembu leLitsheni Youth Academy lilinde ukukhankasela abadlali balo ababalisa uThobani Sibanda, Bruce Ngwenya, Tapelo Dube, Alex Dube, Peacewell Ndlovu, Kwakhiwe Mpofu, Andile “Mane” Dube, Fidel Wafawanaka, Milian Sibanda, Thando Dube loNoel Ndlovu. Laba ngabadlali abafinyelela umdlalo we-final kunkezo kaZibuse.
“Abaze bezozibonela abaqeqetshi bamaqembu asemadolobheni. Silabo abadlali ababadingayo, silalo ithalenta abangeke balithole kwezinye indawo.
Kunkokheli eziphethe umsebenzi wokuphakamisa ithalenta lenguqu leli kulomqondisi wenhlelo uProsper “Madzibaba Elija” Mkando, lomgciningcebo wethu uGerald Katena,” kubika uNyoni ekhuluma lephephandaba likazulu kuliviki.
