Nkosilathi Sibanda
INHLANGANISO yeZimbabwe Volleyball Association (ZVA) isimemezele ikomithi elihlanganisa amalunga alitshumi eLocal Organising Committee (LOC) azakhangela ngokuqhutshwa komqhudelwano weConfederation African Volleyball (CAVB) Zone VI Nations Championships ozadlalela kuleli ngoMpandula.
Imidlalo izaqalisa mhlaka 22 Mpandula kusiyafika umhlaka 1 Mfumfu.
Umongameli walinhlangano uMxolisi Ndlovu uthe sebelungele ukunxusa amaqembu amazwe kulumncintiswano. Uthe ngokuqamba amalunga eLOC kutsho ukuthi sebesesigabeni sokuthi baqale amalungiselelo ngezinga eliphezulu.
Imidlalo ye-CAVB Zone VI Nations Championships izanxusa amaqembu ayedlula angu-20, nanko ilizwe linye ngalinye kukhangelelwe ukuthi lithumele amaqembu amabili abesilisa labesifazane.
Amazwe azancintisa abalisa i-Angola, Botswana, Eswatini, Lesotho, Malawi, Mozambique, Namibia, South Africa, Zambia leZimbabwe.
UNdlovu ubikele iphephandaba likazulu ukuthi owake waba ngumdlali weHighlanders Volleyball Club leUniversity of Zimbabwe uMbekezeli Mthunzi nguye ozakhokhela ikomithi le. Abasekeli bakhe ababili nguPortia Chiwetu loMuziwandile Gumbo.
“I-LOC iphinda ibe lequla labonobhala abahlanganisela u-Enias Kondo, Selome Mashasha lo-Eugenia Mandeya. Kuleli iqula kuloVindicate Chindodo onikezwe umsebenzi wokuphatha imali esebenza loJoseph Dzimati.
Uthe eminye imisebenzi kulikomithi izaphathwa nguTawanda Sithole, Godknows Jembere, Spencer Chitate, Mercy Chatyoka loPriestledge Nhamburo. Abazaphatha umsebenzi wokuvikela ngu-Abel Chimukoko loHector Kabunu.
Umsebenzi wokukhitshwa kwembiko lokuthengiselwana kubikwa uphiwe uStan Mushonga kanti yena uzobe encediswa nguLincoln Dokwani loThomas Mangwiro.
Kusenjalo, umaneja weqembu labesilisa elakuleli, uFarai Mboto uthe bazaqalisa ukulolonga okuzwayo kuliviki.
“Sesizaqalisa ukubuthanisa iqembu lethu, singene enkambeni yokulolonga. Kuliviki sikhangelele ukuthi abadlali bahlangane labaqeqetshi,” kutsho uMboto.
Kuqembu labesilisa kuthwe uRonald Makombe, Trymore Nyakangwa, Nigel Kadumba, Isaac Chokera, Newman Marevanhema, Kudakwashe Tawuya, Tinevimbo Goto, Tatenda Masawi, Keith Machakaire, Matthew Samanyanda, Panashe Sangoya, Proud Nyoni, Douglas Choto, Tafadzwa Keni, Brian Muchera, Tanaka Hwara, Asher Chisadza, Clayton Murere, Murphrey Chindumo loTakudzwa Mashaka.
Ekhuluma ngabadlali laba, uMboto uthe bazame ukuthi bakhethe labo abalesiqinisekelo sokuthi balethalenta njalo balungele ukuyancintisa.
“Bekungelula ukuthi sikhethe abadlali laba ngoba banengi abanjengabo abalethalenta. Kulaba esibakhethileyo, silokwethemba okukhulu ukuthi yibo sibili abalungele ukuyaphakamisa ilizwe emncintiswaneni.”
