uMthunywa
YiNtatheli kaMthunywa
IKOLITSHI lomdlalo wenguqu esabelweni seMatabeleland North iPonel Youth Academy ibika ngokujabula ukuba isilinde ukuthi iqale umnyaka ozayo ngomfutho nanko isigcwele phamu ngobunengi babafana abasakhulayo abakhwabitha ukufunda lumdlalo.
Ukwanda kwabadlali ababhalisa ukuba yingxenye yaleliqembu kuza ngesikhathi isikolo lesi sivule isitolo sempahla yenguqu ngenjongo yokukhankasela ibizo laso ilizwe lonke.
Esabelweni seMatabeland North, iPonel Youth Soccer Academy yinhlanganiso yenguqu yakuqala ukuvula isitolo esithengisa impahla yenguqu edindwe ibizo layo. Kuyisiqalo esibonakale njengesibonelo sokuthi amaqembu enguqu ayenelisa ukuqhuba inhlelo ngokwenza amabhizimusi.
Kubikwa inengi labazali abahlala endaweni ezitshiyeneyo ezibalisa iDete, iBinga, Hwange le-Folosi sebenikeze iPonel Youth Soccer Academy umlandu wokuthi ifundise abantwababo unobhutshuzwayo.
Ekhuluma lephephandaba likazulu ngoLwesibili, umqondisi omkhulu wePonel Youth Soccer Academy uNelson Ndeka wazise ukuba umkhankaso wokukhulisa igama labo usubanike igunya lokuthi balungiselele isizini ka2021.
Amaqembu womdlalo elizweni lonke athembele ukuthi inkundla zizavulwa ngomnyaka ozayo.
“I-Academy yethu iyakhula ngokwanda kwabadlali abasakhulayo abeza ukuzakuba yingxenye lathi,” kutsho uNdeka.
“Sivule isitolo sokuthengisa impahla yenguqu edindwe ibizo lethu kunyanga ezedluleyo okwenze sakhanga amehlo omphakathi kundawo ezitshiyeneyo.”
UNdeka uthe imali abayithola esitolo iphathisa kunhlelo zokuvuselelwa kwenkundla lezakhiwo ezizasetshenziswa kwelizayo.
“Umqondo wethu ubanzi njalo uyacaca. Njengoba ukudlalwa kwebhola kusavaliwe kanje, ukuphatheka kubhizimusi lempahla kusikhuthaze ukuthi sidinge imali ezasebenza kunhlelo zethu ezinengi.
“Kusehlelweni lwethu ukuba lenkundla engeyethu, izakhiwo zabadlali, ezomphakathi kanye lokwakha iHigh Performance Centre ezaqinisa ukufundiswa kwenguqu kwabasakhulayo,” kutsho uNdeka okholelwa ukuba ithalenta lenguqu eZimbabwe ligcwele kodwa lincitshwa usekelo.
Ukuvulwa kwamakolitshi enguqu sekubonakale kuyiyo indlela yokubumba abadlali bohlonzi. Amaqembu womdlalo umhlaba wonke aseqonda kumakolitshi afana le-Ponel Youth Soccer Academy ukuze athole abadlali abapheleleyo.
“Kwelakusasa, kuminyaka emilutshwane nje, iPonel Youth Soccer Academy izakuba yindawo okuhlangana khona abaqeqetshi belwisa ukudinga abadlali. Umkhulu lumsebenzi njalo sizimisele.”
