‘Ikhiwa alidleki’

14 Nov, 2019 - 00:11 0 Views
‘Ikhiwa alidleki’ Hendrik Pieter de Jongh

uMthunywa

YiNtatheli kaMthunywa

UMQEQETSHI owenze kuhle ukwedlula bonke kumidlalo yenguqu yeligi ephakemeyo ku-Castle Premier Soccer League edlalwe kulinyanga ngu-Hendrik Pieter de Jongh.

Umqeqetshi weHighlanders lo, ubizwa ngokuthi Hlabangana lokhe waqala ukukhuza leliqembu ngenyanga kaMpandula. IHighlanders ayikanqotshwa ngokuza kwalumqeqetshi odabuka kwele-Netherlands. UHlabangana uthethe lumsebenzi kuMadinda Ndlovu ongazange athole ukubekezelela abadlali abaqoqa kusakhiwa kakutsha ithimu.

Abadlali abafanayo batshintshe ukwenza ngebhola lenyawo enkundleni sebebona belolongwa ngumqeqetshi lo.

Ngesikhathi sikaKhathazile igedi lalingabonakali, lalapho bezama ukuthi bahlohle, abadlali babebika ukuthi “inyawo ziyasinda”. Kusukela ngoMpandula, iBosso isihlohle kuyo yonke imidlalo yayo.

Iphephandaba likazulu libuze uHlabangana ngeSonto ukuthi kuyini afike wakutshela abadlali.

Umqeqetshi lo uthe, imfihlo yokunqoba kwakhe yikuzwisisana labadlali.

“Sisebenza siliqembu, inhloso yethu yikuthi sizwisisane njengemuli. Silungiselela imidlalo yonke sibambene. Kuqula leHighlanders leli siphethe abadlali abalethalenta, ngakho kumele babonakale,” kutsho lumqeqetshi ngemva komdlalo wabo leqembu le-ZPC Kariba.

Loba lumqeqetshi wakhetha ukuthi asebenze leHighlanders kusiya fika uMpalakazi kuphela, kuyavela ukuthi nxa engenelisa ukunqoba inkezo yeChibuku Super, uzaqhubeka layo kumqhudelwano we-Caf Confederations Cup.

Umgcinisihlalo weHighlanders uKenneth Mhlophe ubikele uMthunywa ukuba nxa ezavuma ukwengeza isivumelwano somsebenzi, iqembu lizajabula ukuthi liqhubeke laye uHlabangana.

“Umqeqetshi onqobayo ufunwa ngumuntu wonke. Nxa engavuma ukuthi abelathi ngesizini ezayo, sizakwamukela lokhu.”

Ngesimo selogu yeCastle Lager okwamanje, iBosso ithe khoxo kwezinkulu ngaphezulu kwenombolo yesihlanu, kodwa nxa uHlabangana engaqhubeka eyilola ekaMatshobana, kulula ukuthi inqobe ize iqede isizini ikunombolo yesine. Lokho kuzakuya ngokuthi eziphezulu ziyanqotshwa ukuze iqanse.

Khathesi lezitha zeHighlanders ziyavuma ukuba umqeqetshi wayo ubedlule bonke.

“Iqiniso kumele silikhuphe loba libuhlungu. IBosso ivukile isibili njalo sibonga ibhola elihle elilethwe ngumqeqetshi wabo omutsha. Kubo bonke abaqeqetshi, isicoco ngisipha oweBosso,” kutsho uDouglas Muneri ongumsekeli weDynamos ekhuluma emsakazweni.

“Okwenza iHighlanders ibonakale yikuthi isidlalela ukunqoba, bekungela kubalandeli bomdlalo onikeze iqembu leli ithuba lokudlala kuhle.”

Osaziwayo kwezokuhlaziywa kwenguqu bavumelana ukuthi iHighlanders liqembu elizadonsa amehlo, ikakhulu nxa ingaqhubeka idlala kuhle.

UAlois Bunjira uthe kubo bonke abaqeqetshi, uDe Jongh usetshengise ukuba uyazi akuqophileyo kuPSL.

“Kuliviki ngitshayela umqeqetshi weHighlanders u-De Jongh ihlombe. Nangu umqeqetshi othethe iqembu phansi waliphakamisa ngesikhathi kungela ocabangelayo. Sizabona okunengi kulisizini, abaqhubeke kuhle,” nguBunjira lo.

Ukunqoba okwenziwa yiHighlanders kukhukhumeze idlabuzane lequla labasekeli bayo.

Sekuvela ukuthi kumidlalo ezayo, kuzakuba ngumthwalo kwamanye amaqembu ukuthi abambe uHlabangana labadlali bakhe.

UMthunywa ukhulume loTinashe “Makhanda” Makanda, umgadli weHighlanders obike ukuba akulamqeqetshi ozafana lo-De Jongh. 

“Usitshengise ukuba ibhola lidlalwa ngendlela efanayo yonke indawo, singesabi lutho njalo siphakamise ukuzethemba kwethu.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds