Ikhilikithi yeT20 eMakhandeni

30 May, 2024 - 00:05 0 Views
Ikhilikithi yeT20 eMakhandeni

uMthunywa

Brandon Moyo

INKUNDLA yeMAKHANDENI Cricket Club izaphatha imidlalo emibili eyeBulawayo Metropolitan Cricket Association (BMCA) Ladies T20 ezadlalwa kulimpelaviki.

Imidlalo le ithembisa ukuletha impelaviki emnandi yekhilikithi yabesifazane njalo inkundla yeMakhandeni Cricket Club izagcwala phamu ngababukeli labathandi balumdlalo.

Imidlalo emibili le izaphawula ngokusemthethweni ukuphela kwesizini ye-BMCA ka-2023/24.

Umdlalo wakuqala uzakuba phakathi kweNketa leBulawayo Athletic Club (BAC) ekuseni ngaphambi kokuthi Amakhosi leQueens Sports Club zihlangane emini. I-Nketa le-BAC zizadlala ngehola lesitshiya galolunye ekuseni, ikanti umdlalo wesibili uzakubakhona ngehola lakuqala emini.

 IQueens Sports Club ihlezi esiqongweni ngemiklomelo eyisitshiyagalombili emidlalweni emihlanu, ngemva kokunqoba kwemine, yahlulwa kowodwa. Amakhosi asendaweni yesibili ngemiklomelo elinganayo. Zombili zihlukaniswa nge-net run rate.

IBAC ihlezi endaweni yesithathu ngemiklomelo emibili nje. Yanqoba kumdlalo owodwa kwemine, okufana leNketa esekucineni kwengalane. Lazo zehlukaniswa nge-net run rate.

UGracious Nsingo weqembu leMakhosi nguye ngokutshaya ama-runs angu-108 emidlalweni emine elesilinganiso se-54. Ulandelwa nguNatasha Mthomba oweQueens osenelise ukuhlanganisa ama-runs angu-74 kuma-innings amabili ngesilinganiso esiyi-37.

UMandy Dube uyakhokhela ngama-wickets amathathu emdlalweni owodwa. Ulingana loTasmeen Granger (imidlalo emithathu), uMthomba (umdlalo owodwa), loNomvelo Sibanda (imidlalo emibili).

Imidlalo yabomama le iqhamuke ngemva kokuphethwa kwamaligi e-BMCA First and Second Leagues lapho okwanqoba khona iMakhosi 1 le-BAC 2.

Iqembu leMakhosi 1 lakhokhela ku-First League ngemiklomelo engu-89 emidlalweni engu-20. Lalandelwa yiQueens ngemiklomelo engu-68. 

Ku-Second League, i-BAC 2 yaqoqa imiklomelo engu-72 kwathi iNketa esendaweni yesibili yaqeda ile-50, ibambene le-Wholesale Beef Bulls. Amaqembu aku-Second League adlala imidlalo engu-16.

Abathandi bekhilikithi bazabukela imidlalo yabesifazane ezadlalelwa Emakhandeni mahala.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds