uMthunywa
Nkosilathi Sibanda
AMAQEMBU adlala kuligi yeZambezi Netball Association angene ekhefini elide lamaviki amathathu ngesikhathi sekudlule imidlalo eyisitshiya galolunye.
Kubikwa imidlalo izaqhubeka mhlaka 2 Mpandula. Ekhuluma lephephandaba likazulu, umqondisi wenhlelo kuZambezi Netball uLastane
Tshuma uthe nxa sebevela kukhefu, kulindeleke ukuthi amaqembu aphindele enkundleni ngomfutho, nanko abesethole ukuphumula.
“Iligi imile ngoba abadlali bathethe ikhefu. Imbangela yokuthatha ikhefu idalwe yikuthi abadlali labo badinga ukuthi baphumule. Kumele siveze njalo ukuthi inengi labadlali bethu ngabafundi, ngakho badinga ukuthi baphumule ngalesi isikhathi.
“Ngokubona kwethu njengenkokheli zeligi yomphakathi yeZambezi Netball Association, kwaba yikuhlakanipha ukuthi sibanikeze ikhefu elincane ukuze babuye sebeqinile njalo sebelungele ukudlala. Imidlalo izaqhubeka mhlaka 2 Mpandula,” kutsho uTshuma.
Andubana kuhanjwe kukhefu, iqembu leKasambezi Queens lime lisesiqongweni sengalane yamaqembu ayisitshiya galombili, liqoqe imiklomelo engu-24. IBangelo Club ilandela eduzane, iphethe imiklomelo efanayo kodwa ihlukaniswa lenkokheli zelogu ngamabhola angu-66. Womabili amaqembu anqobe imidlalo eyisitshiya galombili.
Endaweni yesithathu kukhona iGolden Stars elemiklomelo engu-18, ilandelwa yiGrace Ministries leDiscovery ezisendaweni yesine leyesihlanu ngokulandelana, ziphethe imiklomelo eyisitshiya galolunye. Kusehla, iqembu leShooting Stars likunombolo yesithupha ikanti iGwanzura ihlezi endaweni yesikhombisa ngemiklomelo eyisithupha. Iqembu le-Corinthians lidonsa kanzima. Yilo elisekucineni. Selinqotshwe yonke imidlalo.
