uMthunywa
IKHANSILI yakoBulawayo isimise ukuvalwa kwamanzi obekusibakhona okwamahola angu-72 ngeviki kodwa ithi ingaphinda njalo iqale ukuwavala nxa izakhamizi zingawalondolozi.
Uhlelo lokuvala amanzi lusungulwe kunyanga kaNhlolanja kulandela ukusilela kwamanzi emadamu ngenxa yokungani kuhle kwezulu kanye lokungasebenzi kuhle kwemitshina epompa amanzi. Ikhansili ikhiphe umbiko lo ngoLwesibili njalo lokhu kuzakuba zindaba ezimnandi kuzakhamizi.
“Ikhansili yakoBulawayo ithanda ukwazisa izakhamizi ukuthi isimise ukuvalwa kwamanzi okwasungulwa kunyanga kaNhlolanja lonyaka. Kumqoka ukuthi izakhamizi zazi ukuthi ukungavalwa kwamanzi lokhu kuzahlala kukhona nxa idolobho lingenelisa ukuhlala lisebenzisa amanzi angange-125 megalitres ngelanga. Okwakhathesi sisebenzisa amanzi angange-150 megalitres ngelanga kungakho-ke kumele sehlise isilinganiso samanzi esiwasebenzisayo njengedolobho siye ku-125 megalitres ngelanga,” kutsho umbiko wekhansili.
Ikhansili ikhuthaze izakhamizi zalelidolobho ukuthi zilondoloze amanzi. Amadamu aletha amanzi koBulawayo njengawo wonke amanye aselizweni kamukelanga amanzi eneleyo ngesigaba sezulu sika 2018/19. Izibalo ezike zenziwa ziveza ukuthi amanzi asemadamu ayisilinganiso esingange-57 phesenti.
“Ikhansili yakoBulawayo ikhuthaza izakhamizi ukuba zilondoloze amanzi ziphinde njalo zinanzelele izibalo zamalitha amanzi okumele ziwasebenzise ngelanga. Nxa amanzi engasalondolozwanga ikhansili izaphendukisa njalo uhlelo lokuvalwa kwamanzi,” kutsho umbiko wekhansili.
Umuzi osemalokitshini angentshonalanga yedolobho ukhangelelwe ukusebenzisa amanzi angange 450 litres ngelanga, kukanti osempumalanga ongabe ugoqela lama-cottage akumelanga wedlulise isilinganiso esingage 650 litres samanzi ngelanga. Amafulathi alamamitha awo akhangelelwe ukusebenzisa amanzi angedluli i400 litres ngelanga. —Chronicle
