YiNtatheli kaMthunywa
UMQEQETSHI weKaizer Chiefs uSteve Kompela uthi iqembu lakhe seliphume kumkhankaso wokuthungatha umgadli kulandela ukwehlulwa kwayo nge-1-0 kumdlalo weTelkom Knockout iguqiswa yiBidvest Wits.
Amakhosi alahle amathuba amanengi, ikakhulukazi uDumisani Zuma loGustavo Paez, njengoba iChiefs igcine isikhala ngaphansi kwalumdlalo wangoMgqibelo.
Njengamanje kulisizini, uPaez nguye ohamba phambili ngokuhlohla amabhola kuziMpofana njengoba elamabhola amathathu ngaphansi kwebizo lakhe.
UKomphela usezwakalise ukukhathazeka ngenkinga ekhona yokuswelakala kwamabhola waqinisekisa ukuthi ithimu yakhe isemkhankasweni wokufuna umgadli.
“Lalelani, abagadli bangabagadli. Kungenzeka ukuthi sasilomgadli osezingeni eliphezulu ngaleliya langa, khepha nxa kungayisilo usuku lwakho ayikho into ongayenza.
“Nxa ungangibuza ukuthi kungenzeka yini sithole omunye umgadli, impendulo yami ngethi ‘yikho’. Bengicabanga ukuthi njengoba bekukhona uZuma loPaez sizokwazi ukufaka amabhola. Siwatholile amathuba, kodwa asiwasebenzisanga ngendlela.”
Kusenjalo, uSteve Komphela uchazekile ngendlela asefomini ngayo umdlali wasesiswini uGeorge Maluleka.
UMaluleka usetshaye amabhola amabili, wasiza kwamanye amabili kule isizini, elakamuva nje ibhola alihlohlileyo ulitshaye bedlala loSuthu emqhudelwaneni weTelkom Knockout ngempelasonto edluleyo.
UKomphela ulethemba lokuthi “uMido” ngeke athole kulimala nxa sebedlala leChippa United kuma-quarter final eTelkom Knockout ukuze athola ukuphumula ngekhefu le-Fifa.
“Udlala kahle kakhulu,” kutsho uKomphela ngemva kokuba ezakhe zidlale ngokulingana emdlalweni weligi lePolokwane City.
“UGeorge usebenza ngokuzikhandla. Ungumdlali wasesiswini opheleleyo. Nxa sekuyisikhathi sokuvala emuva usuke ekhona laye kanti futhi nxa ethola ithuba uyaya phambili.”
UKomphela ufuna abafana bakhe batshengise ukuba bukhali phambi kwegedi kulandela ukwehluleka ukutshaya amabhola emanethini.