IJahunda le-Lagondola liphethe ezimnandi

15 Dec, 2022 - 00:12 0 Views
IJahunda le-Lagondola liphethe ezimnandi UDalubuhle Sibanda

uMthunywa

Nkosilathi Sibanda

LABO abadinga ukuzithokozisa koBulawayo ngalinyanga kaMpalakazi, baxwayiswa ukuthi balubhekise enzikini yedolobho bathole indawo lapho abazakhululeka khona njengoba umnyaka usubanga emaphethelweni.

Zinengi indawo ezithembisa ukukholisisa uzulu kodwa zimbalwa ezingatshikilisana lePub Lagondola esiphenduke yaba yinkundla ethandwa ngumphakathi.

Lomsakazo we-Star FM uyakufakaza lokhu, nanko uke wenza uhlelo ePub Lagondola olwadonsa abalaleli abanengi koBulawayo kunsukwana ezisanda kwedlula.

Indawo le, egcwala phamu ngabantu abahlelekileyo, abadinga ukukholisa kwaphezulu, isihlele imicimbi eqoqwe ngohlonzi ezajabulisa bonke abafuna ukugqiba umnyaka, bengene u-2023 ngestayila.

Ngokuza kukamaneja omutsha, uDalubuhle Sibanda, odume ngelithi iJahunda leLagondola, abathandi bomculo, ezemidlalo lezibiliboco sebethole lapho abangazithokozisa khona.

UDalubuhle Sibanda

Lendlamanzi lazo ziyabalwa kulokho.

Ekhuluma lephephandaba likazulu ngoLwesibili, uSibanda uthe akubizwa ozwayo ePub Lagondola ngoMpalakazi.

“Ngamafitshane singathi indlela ziqonde eLagondola kubo bonke abadinga ukukholisa ngesikhathi silinde iKhisimusi lomnyaka ozayo,” kutsho uSibanda odume ngelithi Van Vodloza ku-Twitter.

Uthe bazaphakulula uhlelo oluhlanganisa abaculi laboDJ bakuleli labanye abahlala phetsheya.

“Sikhangelele ukuba labahlabeleli abambalwa labo DJ abakuleli abahlala kwamanye amazwe. Umhlabeleli uTsepi Phuthi loDJ Jabs ngabanye abazathi ukusukumisa inkundla.

USibanda uthe babonga ukuncedisana lomsakazo weZimpapers, iStar FM ekuphakamiseni umsebenzi wabaculi abakulumhlubulo welizwe.

“Sesike sasebenzelana le-Star FM ekusakazeni inhlelo zomculo wakoBulawayo, sisakaza phakathi ePub Lagondola. Lokhu kwakuyisiqalo kubhizimusi lethu njalo layo iStar FM yayiqala ukusakaza iphakathi kwendawo ethandwa ngumphakathi wakoBulawayo.”

Abaculi besifazane kubikwa sebezathola ithuba lokuthi bazibonakalise ngokusungulwa kwe-Ladies Night.

“Ngenjongo yokufuna ukuphakamisa abasifazane abaculayo, sizakuba lensuku zokuthi sibanikeze inkundla ibengeyabo.

“Sicabange ukuthi sibe le-Ladies Night lapho esinxusa bonke abesifazane ukuthi bezozikholisela endaweni yethu engelabandlululo.

“Sesihlale kakhulu sisenza into efanayo, yikho sesifuna ukwenza okutsha okuzajabulisa abantu.”

Uthe ngomnyaka ozayo bazabumba ubudlelwano leminye imisakazo.

“Kusiya phambili sizaba lezinye inhlelo kwezinye izititshi zerediyo ezizabe zisakaza zisukela eLagondola. Lalabo abafuna ukwenza imicimbi yabo ngaliKhisimusi bakhululekile ukuza bezoxoxisana lathi,” kutsho uSibanda.

Share This:

Sponsored Links

Survey


We value your opinion! Take a moment to complete our survey

This will close in 20 seconds