uMthunywa
Nkosilathi Sibanda
IBULAWAYO Chiefs iqhubeka isiba liqembu elihamba phambili kwezokuphawulwa kwembiko ebulenjini nanko phela selibe ngelakuqala njalo ukuba le-Mobile Application kuwo wonke amaqembu akuligi yeCastle Lager.
Ukusungulwa kwe-App le kutsho ukuba Amakhosi Amahle asezenelisa ukuxhumana labasekeli bayo lalabo abayithandayo kalula kubomakhalekhukhwini lakuzigxingi zokuxhumana eziphucukileyo.
Iqula eliphethe imbiko ekhitshwa ebulenjini kuleliqembu ekhokhelwa nguThulani “Javas” Sibanda ngoLwesithathu likhiphe umbiko kukhasi labo leTwitter owokuthi bazakuya phambili ngokuhwatsha iApp entsha.
IBulawayo Chiefs ibike ukuba iApp yabo le izatholakala esitolo seGoogle Play ngoMvulo.
Kulandela lokhu, leqembu leCAPS United ligijimele kuTwitter labika ukuba lalo lilungiselela iApp entsha.
Kusizini edluleyo, uMthunywa waba liphephandaba lakuqala ukuncoma umsebenzi weBulawayo Chiefs ngokuxhumana labasekeli bayo ebulenjini.
Okwamanje Amakhosi Amahle asedonse abalandeli abafika i13 000 ebulenjini kodwa ngesikhathi semidlalo, leliqembu lisekelwa ngabantu abangedluli amakhulu amathathu enkundleni.
