Ihlose okukhulu iGwanda ZRP FC

31 Aug, 2023 - 00:08 0 Views
Ihlose okukhulu iGwanda ZRP FC Gwanda ZRP FC

uMthunywa

Nkosilathi Sibanda
IQEMBU lenguqu elidlala kuZifa Matabeleland South Division Two, iGwanda ZRP FC likhangelele ukunqoba yonke imidlalo eseleyo njengoba lihlose ukukhuphukela kusigaba saphezulu kuligi ngesizini ezayo.

Ngemva kwemidlalo engu-10 edlalwe kuligi kuze kube khathesi, iqembu lamapholisa leli yilo elikhokhelayo ngemiklomelo engu-25, nanko selinqobe imidlalo eyisitshiya galombili, ladlala ngokulingana kowodwa, lahlulwa kowodwa kulumkhankaso.

Ingxenye yesibili yeligi izaqala mhlaka 9 Mpandula, lapho iqembu lamapholisa elizatholana phezulu leqembu leSuper Strikers elikunombolo yesihlanu kulogu.

Womabili amaqembu alabandeli abanengi edolobheni lezimbamgodi eGwanda ngoba angomakhelwane. Umdlalo lo ungomunye okhangelelwe ukuthi udonse inengi labantu.

Lanxa imidlalo yeligi iphakathi kwekhefu elifitshane, ukuqhubeka kuhle kweqembu leGwanda ZRP FC kuthokozise umqeqetshi uMorris Chiwara oveze ukuthi usehlanganise iqembu elizalwela ukuyafika ku-Division One.

“Besikukhefu lesizini, njengoba iligi ibivule ithuba lokuthi siyevota kuma-Harmonised Elections. Iqembu lethu belingadlali ngosuku lweDefence Forces Day. Sesiqalile ukuzilolonga silungiselela isigaba sesibili seligi.

“Iqembu lethu lihamba phambili futhi sesikubeke kwacaca inhloso yethu yokuthi sifuna ukuyinqoba yonke imidlalo eseleyo. Inhloso ngeyokuthi sikhuphuke siye ku-Division One njengoba sikhangelele ukuthola isicoco segolide kusigaba somdlalo kwelakusasa,” kutsho uChiwara.

Uthe bazasebenzisa ikhefu ukuze baqinise iqembu labo.

“Njengawo wonke amaqembu akuligi, lathi sizazama ukuqinisa abadlali bethu. Sihlela ukwengeza ngokudinga abadlali abathile. Silindele ingxenye yesibili yesizini enhle kakhulu, futhi ethokozisayo.

Imidlalo yethu siyayiqala labomakhelwane bethu abalomsindo iSuper Strikers FC. Lo ngumdlalo omkhulu ngoba iStrikers izafuna ukuziphindiselela ngemva kokuba sayehlula nge1-0 kusigaba sakuqala.

Esikufisayo ngesikhathi silungiselela yikuthi abalandeli bayekele udlame bavume ngokwaneleyo ukwamukela impumela yemidlalo.”

Talen Vision FC

UChiwara uthe kumalumgiselelo abo esigaba sesibili, bahlele ukudlala umdlalo wobungane leqembu leZifa Southern Region Division One, iTalen Vision FC.

“Kungenzeka sibe lomdlalo wobungane enkundleni yethu leSouthern Region Division One, iTalen Vision, ukuze siqinise amalungiselelo ethu okuya esigabeni sesibili. Silindele ukuthi sengeze iqembu ngabadlali abatsha,” kutsho uChiwara.

Loba umqeqetshi weqembu lamapholisa elethemba lokuqhubeka ngendlela yokunqoba, usahlezi eqaphele ukuba kulamaqembu ahlaselayo abalisa iWest FC ekunombolo yesibili, iphethe imiklomelo engu-21. Leqembu leMawabeni leWest Academy akunombolo yesithathu leyesine zingadlala kuhle ukuze ziphakame kulogu.

Share This:

Sponsored Links

Survey


We value your opinion! Take a moment to complete our survey

This will close in 20 seconds