uMthunywa
Ethel Ncube
ZISELE zibambe owangaphansi izakhamizi zeZhombe ngemva kokuba kuphandwe ingcwaba kwatshontshwa isidumbu sesinye isakhamuzi ebesisanda kungcwatshwa.
Isindabaphenduli le isilenyanga yenzakale. Imuli yakoDube yalimukiswa ngomunye wezakhamizi owabika ukuba engcwabeni kungabe sokonakele baphanga bayafika khona bathola ingcwaba likamuyi liphandiwe kwathathwa konke ibhokisi lesidumbu.
Intatheli ixhumane lesinye isakhamuzi sakule indawo uMnumzana Themba Moyo ochaze ukuba udaba lolu luliqiniso.
“Silokhu sidinga ukuba umuyi angabe wathathwa ngubani njalo bamtshiya ngaphi? Mina bangibiza kuthiwa igodi selikhamisile, kukhanya akusela sidumbu phakathi ngahamba safika sagebha saze safika phansi lapho okwakufakwe khona izigodo zokwendlala sathola kungaselasidumbu kanye lebhokisi.
“Kuthe sekunjalo babuzisisa ebantwini ukuba kungabe kukhona ololwazi ukuthi kungabe kuke kwabonakala isidumbu kwenye indawo akuzange kube lempendulo esuthisayo eyavelayo,” kutsho uMnu Moyo.
Uqhubekele phambili eveza ukuba abantu abalankani lokutshontshwa kwesidumbu esiqintini sabo.
“Asazi ukuthi ngubani ongenza into elihlazo kangaka. Kambe umuntu agebhe ingcwaba athwale konke isidumbu lebhokisi. Udaba lolu lokhu bephezu kwalo abemuli njalo kukhanya sebevela lakubosiyazi kodwa angizange ngizwe ukuthi kwathiwani kubosiyazi,” kutsho uMnu Moyo.
Ekhuluma loMthunywa omunye oyisihlobo semuli owale ukuveza igama lakhe esesabela ukuphambanisa ucwaningo uthe njengomdeni badidekile ngesehlakalo esinje.
“Engingakutsho yikuthi umuyi lebhokisi lakhe asikakutholi njalo olunye ulwazi ngeke ngilukhulume ephepheni ngoba luzaphazamisa uphenyo lwethu, njengemuli sizama esikuzamayo kodwa ngeke sikubikele uzulu wonke,” kutsho omunye welunga lemuli.
Iphephandaba likazulu likhulumisane lenduna uMalisa ochaze ukuba udaba lolu kalalwazi ngalo.
“Mina ngeke ngivume kumbe ngale ngithi ngamanga ngoba akulamuntu owabuya wazobika kimi njengenduna ngalokhu okwenzakalayo, lami ngikuzwa nje ebantwini kodwa angilaqiniso lakho,” kuphetha uMalisa.
