uMthunywa
YiNtatheli kaMthunywa
IDOLOBHO leGwanda lizaqhuba umncintiswano womdlalo weTennis kulimpelaviki enkundleni zeCollen Bawn, okwakuqala kwemidlalo kulindawo esalele emuva ekhuthuthukiseni ezemidlalo.
Umncintiswano obizwa ngokuthi yiGwanda Junior Tennis Tournament uzaqhutshwa kusukela ngoLwesihlanu kuze uvalwe ngeSonto njalo udibanise abadlali abaleminyaka yokuzalwa ephakathi kwetshumi kusiya ku-18.
Abadlali laba baphuma ezikolo eziyisitshiya galombili. Lezi izikolo zibalisa iSt Christopher’s, iGwanda High, iSenondo, iJahunda, iCollen Bawn, iPortland, iSabiwa leGwanda Adventist.
Abadlali abazaphatheka labaqeqetshi babo badlula kuzifundo zokwazi lumdlalo ekuqaleni komnyaka.
Abaqoqi bomncintiswano babikele uMthunywa ukuba inhloso yabo ngeyokuncedisa ithalenta lomdlalo wethenisi elisakhulayo ezikolo.
Ngokusilela kwenkundla zemidlalo eGwanda, kungenzeka lumncintiswano ubukelwe ngabantu abalutshwane.
UMtshutshisi Matema ongumqondisi wemidlalo uyavuma ukuthi umdlalo wethenisi kumele ubatshazwe kulindawo.
“Umdlalo we-tennis usakhula eGwanda. Sesizamile ukuthi siwugcwalise ezikolo yikho siqhuba lumncintiswano. Inkinga yikuthi akula nkundla kwezinye izikolo.”
UMatema ukhuthaze izikolo ukuthi zinikele imali ekwakheni inkundla zemidlalo ye-tennis.
Kusenjalo umqeqetshi wodumo kuleli uThesly Mufunda uthe usekhuthaze abadlali abasakhulayo ukuthi bazibonakalise ngokuphumelela kumncintiswano yabo.
Uthe abadlali abamela isizwe kumncintiswano eminengi bakhethwa ngoba beveze ukuzinikela.
“Nxa kukhethwa abadlali abazamela isizwe kukhangelisiswa labo abaqhubeka ngokwenza kahle kumincintiswano.
“Nxa umdlali ezimisele njalo etshengisela ukuthi uyanqoba kumidlalo yakhe, ngeke sikhangele eceleni. Sikhetha labo abenza kuhle kummcintiswano yakuleli laleyo eqhutshwa phetsheya kwelizwe.
