uMthunywa
Ethel Ncube
KULENDODA yeMpandeni ePlumtree ewise iphika ngemva kokukhutshwa igundwane ebeselihlale iminyaka emithathu limudla unyawo ubusuku lemini, uMthunywa uyakuveza lokhu lamhlanje.
UMnumzana Edwin Ndlovu uphume inkalakatha yegundwane eliphilayo esithendeni.
Igundwane leli lipuntshuke enyaweni lukaMnu Ndlovu ngemva kokukhulekelwa nguMphurofethi uNhlanhla Ndlovu ngeviki ephelileyo.
Intatheli ixhumane lomunye umfakazi oqotho owakule indawo oveze ukuba kuliqiniso ukuba kwaphuma igundwane enyaweni lukaMnu Ndlovu.
“Kukhanya uNdlovu wafakwa imvukuzane enyaweni ngumalumakhe kodwa yena sowadlula emhlabeni kubangwa inkomo. Babehlala befungelana ijoyi umalumakhe waze wamfaka igundwane leli.
“Ukuthi langena njani lami angilaqiniso lakho kodwa ubeseleminyaka emithathu ethwele nzima ngonyawo. Ubesebhode kubosiyazi waze wadela, uze wacina esizwa nguMphurofethi uNdlovu othe emthandazela lathi puntshu igundwane enyaweni. Kusukela lapho lebusweni ukhanya usengcono kakhulu sibili,” kubika umfakazi lo.
UMthunywa uxhumane loMphurofethi uNhlanhla Ndlovu onguye owakhupha igundwane oveze ukuba liqiniso.
“Ubaba uthi ubeseleminyaka emithathu unyawo lubuhlungu igundwane limgebha limudla. Umuntu owamfakayo yisihlobo sakhe kodwa sewabhubha. Igundwane leli liphume liphila njalo belilikhulu futhi liloboya,” kubika uMphurofethi uNdlovu.
Imizamo yokuxhumana loMnu Edwin Ndlovu yehlule ngoba ucingo lwakhe lungangeni.
