Innocent Kurira
ABAPHATHI bayo kukhanya bayakubona ukuthi isingatshelela ikhuthe ugatsha iHighlanders kodwa baqina ngokucela abalandeli ukuthi babe lokubekezela.
Indlela iHighlanders edlala ngayo kayithabisi uzhizhi lwabalandeli bayo, okuthe kuqala isizini yeCastle Lager Premier Soccer League lonyaka bakholwa ukuthi umqeqetshi uKelvin Kaindu nguye ozabafikisa eKhenani, ayithwale inkezo yeligi.
Kuthe isinqotshwa, kwaqala ukudana lokukhonona sekudlalwe imidlalo elitshumi lanye kumkhankaso weCastle Lager.
NgoLwesine emini kuvulwa amagedi eBarbourfields njalo sekufakwe isimemezelo sokuthi abasekeli bagcwalise inkundla loba iqembu liqhula.
IHighlanders izabe ileManica Diamonds.
Itikiti elitshiphileyo lokubukela umdlalo lo liyi-US$5. IBosso icabange ukukhweza imali yokubukela umdlalo kodwa abalandeli bayakhonona, nanko umdlalo uphakathi kweviki.
Ngokwanda kwezinsolo ngokukhwezwa kwemali yamatikiti, iqembu kalizange lizihluphe ngokulalela isikhalazo. Likhethe ukuthi lethule umbiko lincenga abasekeli ukuthi baze ngobunengi ngoba umdlalo leManica Diamonds umkhulu.
“Wozani ngobunengi lizoxhasa iqembu lenu, kumele sikwamukele, sibonge njalo. Siyalincoma.Siyabonga.
“NgoLwesine mhlaka 23 kulomdlalo omkhulu. Siqondana labakhokhela ilogu. Bakithi, asibuyeni ngobunengi bethu sigcwalise eMagumeni, sihlabele sisekela iqembu lethu. Amandla ethu akubasekeli. Lisibekezelele bakwethu,” kutsho umbiko weHighlanders osabalale kunkundla zokuxhumana ebulenjini.
IBosso ibonge inhlanganiso yePSL ngokunikwa imvumo yokukhweza imali emagedini.
“Siyabonga kuPSL ngokusivumela ukuthi sikhweze mbijana imali yokungena enkundleni. Ebunandini lasebunzimeni, sithembe lina maBosso,” kutsho iHighlanders kumbiko wayo.
IBosso ike yakhokhela kungalane yePSL, kodwa ukwehluleka kudale ukuthi yehlukane leManica Diamonds ngemiklomelo emine.
IHighlanders yacina ukunqoba kuligi mhlaka 28 Mpalakazi, inqoba iCAPS United nge 2-0 enkundleni yeBarbourfields.
