Ifulegi yeZimbabwe ngizayiphakamisela phezulu

04 Oct, 2018 - 02:10 0 Views
Ifulegi yeZimbabwe ngizayiphakamisela phezulu

uMthunywa

NGEZIMNANDI zodwa ezilethwa liphephandaba likazulu kusa kwamalanga nanko phela kule iviki lize lengadlangadla yejaha elimajaha mabili elisakhulayo eliyiphakamisela phezulu ifulegi yeZimbabwe ngomculo we-hip-hop eSouth Africa.

Nxa ufuna ukwazi kabanzi ngomculi lo osakhulayo kodwa osekhethwe (nominie) kuma-awards aweSouth Africa qhubeka ufunda nansi ingxoxo ekhwabithekayo phakathi kukaMlungisi Moyo (MM) lentatheli yephephandaba likazulu uThando Dube (TD).

TD: Ake usithi fahlafahla utshele uzulu ngawe jaha ?

MM: Mina ngokuzalwa nginguMlungisi Moyo kodwa nxa ngicula ngaziwa ngebizo elithi Mlu Jay. Ngicula imihlobo eminengi yomculo kodwa engiwuthakazelelayo ngumculo we-hip-hop. Ngileminyaka engu 21 yokuzalwa. Ngingumculi ocula eseSouth Africa njalo ngenza izifundo zami zeSound Engineering kanye leMusic Business ekolitshini.

TD: Izifundo zakho ezihambisana lomculo sezikuphathise njani emculweni wakho?

MM: Ngakhetha ukufunda izifundo zami ezihambisana lomculo ngemva kokunanzelela uthando lwami lomculo. Izifundo zami lezi ziyawuphakamisa umculo wami ngoba senginanzelela njalo ukuthi umculo uphathwa njani nxa ufuna ukuphumelela.

TD: Abantu bathini ngomsebenzi wakho khonangapho kweleSouth Africa?

MM: Umculo wami bayawuthakazelela okwamagama njalo ngiyamenywa ezindaweni ezehlukeneyo zelizwe leSouth Africa, labaculi abalodumo ngisebenzisana labo ngoba bayananzelela ithalenta engilalo.

Awuthakazelelwa kuphela kweleSouth Africa kodwa laseZimbabwe bayawuthakazelela njalo bayawulalela osokwenze ngathola indondo kumaChangamire Hip-hop Awards kuhlandla leBest Diaspora.

TD: Zindaba ezimnandi lezo jaha elidala, amahungahunga aveza ukuthi sukhethwe njalo kuma Live Your Dream Awards khonangapho kwele South Africa, liqiniso yini?

MM: Liqiniso sibili, lawa ama-awards azakwenziwa eDurban mhlaka 24 ngoLwezi. Ngikhangelele ukunqoba ngoba umculo wami kudlalade lami elihamba ngebizo elithi Picture paint uthakazelwa ngabantu kakhulu njalo uyadlalwa kumisakazo eminengi lapha.

TD: Kuqakatheke kangakanani ukuthola indondo kuma-awards la.

MM: Kuqakatheke kakhulu kimi ukuthola indondo le ngoba kuyaba yisibonakaliso sokuthi angisebenzeli ize njalo kuzaba yisikhuthazo kubaculi beZimbabwe abafana lakimi ukuthi umculo siyawazi njalo siyenelisa ukuphumelela kuwo njengawo wonke umuntu emazweni aphucukileyo.

TD: Sikufisela inhlanhla mfowethu. Nkuthazo bani ongayitshiyela abanye abaculi beZimbabwe abafuna ukwenza umculo ube yibhizimusi?

MM: Ngibakhuthaza ukuthi basebenze gadalala ukuze baphumelele. Siyafana nje njengabaculi abadumileyo kweleSouth Africa ngakho singasebenza gadalala sizafika lathi ebangeni abakulo njalo siziphilise ngomculo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds