uMthunywa
YiNtatheli kaMthunywa
ILIZWE leZimbabwe kukhangelelwe ukuthi lamukele uluhlu lokuqala lomuthi wokuvikela iCovid-19 ngoMvulo ozayo besekusithi owesibili kukhangelelwe ukuthi ufike ekuqaleni kwenyanga ezayo njengoba uHulumende ezinikele ukuthi avikele izizalwane zakuleli kubhubhane lolu.
UHulumende ubeke eceleni iUS$100 miliyoni yokuthenga umuthi wokuvikela iCovid-19 kukanti uHulumende welizweni leChina uselule isandla wanika ilizwe amadozi angu-200 000 omuthi obizwa ngokuthi yi-Sinopharm Covid-19 vaccine.
UHulumende uthe akulamuntu ozabanjwa ngamandla ukuthi anikwe umuthi lo, kuhlelo lolu.
Ekhuluma lentatheli ngemva komhlangano weKhabhinethi ngoLwesibili, uMphathintambo obona ngokukhitshwa kwembiko uMonica Mutsvangwa uthe izisebenzi eziphambili kuhlangothi lwezempilakahle yizo ezizaqakathekiswa ekwabiweni komuthi weCovid-19.
“Mayelana lokuthengwa kwemithi yokuvikela umkhuhlane, uHulumende wePeople’s Republic of China welule isandla wasinika amadozi angu-200 000 eSinopharm Covid-19 vaccine. Isipho lesi kanye lomuthi wokuqala othengiweyo ukhangelelwe ukuthi ubeselizweni mhlaka 15 Nhlolanja 2021 kanye langeviki yokuqala kaMbimbitho 2021, ngokulandelana.
“Ukusebenza ngempumelelo komuthi wokuvikela iCovid-19 iSonopharm ngesilinganiso se-76 kusiya ku-86 kwagcizelelwa yi-World Health Organisation,” kutsho uMphathintambo Mutsvangwa.
“Iyaqhubeka imizamo yokuthenga eminye imithi yeCovid-19 efana le-Sputnik V (Victory) evela eRussia, phakathi kweminye isendleleni. Ilizwe leNdiya, njengeChina lalo linike isipho kanye lokuthi singakhetha ukuthenga. Ilizwe leZimbabwe liphinde laveza isifiso salo sokuphatheka kuhlelo lwe-African Union Covid-19 Vaccination Program.”
UMphathintambo lo uthe amankampani azimeleyo azancedisana loHulumende ukuthenga umuthi weCovid-19 kanti amanye akhona azathengela izisebenzi zawo.
Uthe ilizwe lihlose ukuthi kuhlatshwe abantu abafika i10 miliyoni.
“Mayelana lohlelo lokuvikela iCovid-19, ugatsha olubona ngezeMpilakahle kanye lokondliwa kuhle kwabantwana lukhangelele ukuthi kuhlatshwe isilinganiso se-60 phesenti sabantu abaselizweni ukuze kufinyelwelwe abantu abangu-10 miliyoni. Uhlelo lwentuthuko olutshengisa amaqembu okumele anikwe kuqala umuthi selwenziwe.
UHulumende usebeke eceleni imali engaba yiUS$100 miliyoni yokuthenga imithi yeCovid-19. I-Treasury izaqhubeka ikuqinisekisa ukuxhaswa ngemali yokuthenga eminye imithi yokwelapha kanye lempahla yokuvikela ukumemetheka kweCovid-19,” kutsho uMphathintambo uMutsvangwa.
