Uncategorized

Ifihlwa ngempelaviki induna uMalaba

13 Jun, 2024 - 00:06 0 Views
Ifihlwa ngempelaviki induna uMalaba Induna uDavid Malaba

uMthunywa

Ethel Ncube

INDUNA yeKezi uMalaba ekhothame ngoLwesihlanu lweviki ephelileyo izafihlwa ngoMgqibelo emzini wayo.
Induna uDavid Malaba ikhothame isileminyaka engu-86 yokuzalwa ngemva kokugula ikhathazwa yisifuba.

Induna uMalaba ibilabalisa abagoqela uMpamadze Makawule, Sigangatsha loBewula.

Umfundisi webandla leRoman Catholic eSt Joseph uFatha Innocent Ndlovu ubike ukuba induna izafihlwa ngoMgqibelo.
“Silahlekelwe kakhulu ngokwedlula emhlabeni kuka baba uMalaba. UMalaba sikhangelele ukuba afihlwe ngoMgqibelo. Inkonzo izaqala ngehola lesikhombisa ekuseni.

“Ubaba uMalaba ubengumuntu obethanda abantu njalo esebenzisana kuhle lozulu. Ubethi nxa into imbi engayifuni ahle asole khonapho. Ubelomusa njalo ephatheka emisebenzini eminengi, ngomnyaka ophelileyo sivakatshelwe ngumongameli welizwe wakhupha inkomo eyodwa wasipha ukuba incedise,” kutsho uFatha Ndlovu.

Uqhubekele phambili njalo eveza ukuba induna uMalaba ibingumuntu osebenza nzima.

“Induna ibingumlimi omkhulu, ilima izilimo ezifana lophoko ithi nxa sokuvuthiwe emasimini ingibize ithi: ‘mfundisi nantu uphoko uzakwenza ilambazi kumbe uyekupha abadala benze utshwala ekhaya.”

“Okunye njalo uMalaba ubehlala ekhona isikhathi sonke ubengaswelakali nxa abantu bemdinga. Ubengumuntu olondoloza imvelo lamasiko njalo ehlonipha wonke umuntu engakhethi. Silahlekelwe kakhulu ngokudlula kwakhe emhlabeni,” kubika uFatha Ndlovu.
Intatheli ibuye yaxhumana loDistrict Administrator weMaphisa uMnumzana Obey Chaputsira obike ukuba induna izafihlwa ngempelaviki.

“NgoLwesithathu kubelesikhumbuzo senkonzo yenduna emzini wayo ekuseni. Umzimba wayo uzasuka koBulawayo ngoLwesihlanu uyelala ekhaya kuthi ngoMgqibelo ekuseni ngehola lesikhombisa kuzaqalwa inkonzo kulapho induna ezafihlwa khona emzini wayo,’’ kuphetha uMnu Chaputsira.

Share This:

Sponsored Links

Survey


We value your opinion! Take a moment to complete our survey

This will close in 20 seconds