Ethel Ncube
AKUBIZWA ozwayo edolobheni lePlumtree eChicken King ngoLweSihlanu lapho iqembu leDubia Masters elizabe lihwatsha khona idlalade labo elitsha.
UKholwani Dube ongumholi weqembu leli uveze ukuba idlalade labo liphume ekuqaleni kukaNcwabakazi eMzansi njalo khathesi sebebuye ekhaya ukuba bazolethulela abantu.
Ekhuluma lentatheli uKholwani Dube ubike ukuba idlalade labo lilengoma eziyisikhombisa,
“Idlalade lethu libizwa ngokuthi Amagama Ahlabayo njalo lilengoma eziyisikhombisa ezibalisela uNama Nana, Kgotso, Tjamuka nyama, Umoya wesithembo, Gobiqolo Sibali, Amagama Ahlabayo lethi Induku Emqhubeni. Idlalade lethu sesibuyile ukuzelethula kuzulu ePlumtree, ngoMgqibelo siyabe sikoBulawayo eTshisanyama eKelvin lapho esizalethula khona. EMzansi sesalethula abantu balithakazelela kakhulu.
“Idlalade lethu laphuma eMzansi mhlaka 3 Ncwabakazi, kwakungasimuntu kungani litshebetshebe lomfula. Ingoma zethu zathengwa kakhulu ngoba ababili abathengayo uListen Moyo loDerick Matobolo bathenga ngeR10 000 kwalandela uSipho Mlahlo wathenga nge R7 000 kwabuya uBrian Mahlangu owathenga ngeR 5000 abalandelayo babethenga ngamaR 1000 langezinye imali. EMzansi basisekela kakhulu ngoba ngesikhathi sigida imali zazilokhu zijikwa ngabantu,” kubika uKholwani
Uqhubekele phambili eveza ukuba uzulu wonke kasondele azozizwela ubunandi.
“Bantu bakithi sondelani konke okuhle sibuye lakho, silezikipa, ama USB, amakepesi kanye lamaCD ngokwenu. Siyalinxusa lonke ukuba libuye lizozizwela, libukele sihwatsha idlalade lethu ePlumtree lakoBulawayo. Lingakhohlwa ukusilandela ekhasini lethu lefacebook Dubia Music Production lakuSpotify ingoma zethu zikhona,” kuphetha uKholwani.
