Nkosilathi Sibanda
UMGADLI weqembu leziqholo zeZhwane iTsholotsho FC, uWilliam Stima usebike ukuba kuzatsheka ibhetshu kuqembu leDynamos mhla bedlala lalo ngoMgqibelo emagumeni.
UStima uthe angeke bedlulwe ngamanye amathimu asetshaye iDeMbare ayiphendulela ngokuyinqoba kumidlalo eyisikhombisa edluleyo.
Umdlali lo ubike ukuthi uzatshibilika ngendlela engakaze ibonakale kumbali yenguqu yePSL.
“Umdlalo lo ungabe ukhanya unzima kuligi kodwa iDeMbare ngamanzi amancinyane, yithimu esixega okokuthi kuzakuba lula ukuthi siyibhoboze,” kuveza uStima.
“Sizinikeza ithemba lokunqoba ngoba sidlala ekhaya lapho esilabalandeli abanengi. Lokhu kuzasikhokhela ukuthi lathi sidlalele ukunqoba.”
Ngokudlala kweTsholotsho kumidlalo eyisithupha edluleyo, ithimu le iqinile ukwedlula intshantshu zika2014 ezidonsa nzima emsamo welogu yeCastle.
Okwamanje iDynamos iza koBulawayo ithwele imklomelo emihlanu kuphela. Kulogu ivala umnyango kunombolo yesi-17 kuthi Iziqholo zeZhwane zimi kunombolo yetshumi lambili.
Ukuqathanisa amathimu la kutshiya abafana beMbare bengelathuba lokucabangela ukuthi bengaphuma eBarbourfields ngoMgqibelo.
Loba amathimu la esenqotshwe kumidlalo emibili, iTsholotsho ihamba phambili ngokuhlohla amabhola amahlanu. Izethekeli zona sezibhoboze umambule kabili.
Umqeqetshi uLizwe Sweswe uthe umdlalo lo uwubamba njengayo yonke ngenxa yokuthi iDynamos ayehlukananga lamanye amathimu.
“Akutshintshi lutho ukuthi sidlala leDynamos. Umdlalo lo siwulungiselela ngendlela efanayo,” kutsho uSweswe.
“Ukuzimisela kwabadlali kanye losekelo lwabalandeli yikho okuzanikeza imklomelo yonke eBarbourfields.”
NgoMgqibelo: FC Platinum v Border Strikers (Mandava), Tsholotsho v Dynamos (Barbourfields), Chapungu v Ngezi Platinum (Ascot), CAPS United v ZPC Kariba (Rufaro)
NgeSonto: Mutare City v Chicken Inn (Sakubva), Triangle v Bulawayo City (Gibbo), How Mine v Harare City