uMthunywa
IMIDLALO yenkezo yeCOPA Coca-Cola isitshintshe impilo zabadlali abasakhulayo ezikolo ikakhulu kumaqembu amantombazana asezibona elethuba lokuphila ngonobhutshuzwayo.
Lonyaka umqhudelwano wezikolo lo uqhutshwa okwamatshumi amathathu lanye. Imidlalo yokudinga intshantshu zezabelo iqala ngeviki elizayo kulandela ukucintisana kwezigaba.
Umqhudelwano lo, omngumthimba wezemidlalo omkhulu ukwedlula yonke kukhalenda yezikolo, uzagqitshwa ngempelaviki yomhlaka 7 kusiya ku 9 Ntulikazi enkabazwe.
Kusukela kwasungulwa umdlalo wamantombazana ngaphansi kweCOPA Coca-Cola, sekuvele ukuba abantwana abangamankazana sebekhwabitha ukugiqa ngoba benanzelela utshintsho oluhle olusempilweni zalobo abake baphatheka kulumdlalo.
Ngomnyaka odluleyo, isizwe seZimbabwe senze kuhle kuqula lamantombazana kwele-Kenya.Okwamanje izikolo eziphethe ziyintshantshu ezigabeni kubikwa zizadibana kumpelaviki ezayo.
Kungxoxo lephephandaba likazulu kumaviki amabili adluleyo, abadlali bezikolo ezikuzabelo ezikoBulawayo laseMatabeleland bathe iphupho labo yikuthi bakhule lomdlalo webhola.
Abantwana laba babalise ukuba bathola inkuthazo kulabo abake badlalela isizwe ikakhulu uNomsa ‘Boyz’ Moyo loSithethelelwe ‘Kwinji 15’ Sibanda.
Bobabili laba badlalela iqembu lesizwe amaMighty Warriors njalo uSibanda nguye umqeqetshi weqembu lesizwe. UMoyo usengumkhokheli wezokukhankasela impilakahle yabadlali kunhlanganiso yeFootball Union of Zimbabwe.
Inkuthazo evele kuMoyo ngeyokuthi abasakhulayo, ikakhulu amankazana, kumele babekezele kunguqu.
“Ngikhuthaza abantwabethu abadlala inguqu ukuthi bazame ukuzibamba, bathole ithuba lokuthi bafunde ngomdlalo ukuze bathole inzuzo kuyo. Imncintiswano efana leCOPA Coca-Cola inikeza umdlali inkundla yokuthi azitshengisele emphakathini.
Umqeqetshi wamaMighty Warriors uSibanda uthe: “Kunengi okuhle, okusiza abadlali abaphatheka emncintiswaneni enjengeCOPA Coca Cola. Thina sisadlala kwakungela mncintiswano le kodwa khathesi nanti ithuba lokuvakatshela indawo ezitshiyeneyo, ukufika emazweni kanye lokuphiwa ithuba lokukhetha impilo enhle.
“Abadlali abasezikolo abakhuthazwe ukusebenzisa amathuba anje besakhula ngoba ayisiqalo sempilakahle.”
Lomgcinisihlalo wenhlanganiso yeNational Association of Secondary Heads (Nash) uArthur Maphosa ubike ukuthi imincintiswano enjengale kumele ibe yinkuthazo kuzikolo ukuthi ziqalise ukulolonga amantombazana kunguqu.
“Abantwana abangamankazana bayaswela amathuba okuzibonakalisa kundawo ezinengi, kodwa imincintiswano yenguqu enjenge COPA Coca-Cola inikeza ithuba lokuthi abantwabethu baveze ithalenta labo.”
Kusenjalo, kulumhlubulo welizwe imidlalo yezabelo izaqhutshelwa enkundleni zeGifford High kuzikolo ezikoBulawayo. Isigaba seBubi sizaphatha imidlalo yeMatabeleland north, kuthi eMat south kubuthanwe eMangwe.
KoBulawayo isikolo seMagwegwe High kumantombazana sibika ukuba asehlulwa yilutho kwezomdlalo webhola likanobhutshuzwayo ngakho sizasondelela kunkezo enkulu.
