uMthunywa
Nkosilathi Sibanda
UMQEQETSHI wentshantshu zeligi yeCastle iChicken Inn ubika ukuthi kaselandaba lokunengi ngaphandle kokuthi aqinise ithimu yakhe ukuze ilungele ukuyancintisa lezinye ingcitshi zikanobhutshuzwayo kuzwekazi leAfrica kunyanga kaZibandlela.
AmaGamecocks azamela iZimabwe kumqhugelwano omkhulu weConfederation Cup odlalelwa zintshantshu zamaligi emazweni wonke adlala inguqu eAfrica.
UAntipas uxoxe loMthunywa kuliviki waveza ukuthi kasoze ehlise amajogwe.
Umqeqetshi lo usengena kumkhankaso wenkezo yeConfederations okwesibili lokhe waqala ukuqeqetsha kuligi ephakemeyo. Ngomnyaka ka2010 wathwala inkezo yePSL ekhuza iMotor Action, iqembu ahamba lalo kumidlalo yeAfrica.
Uthe uzitshaya isifuba ngokudlala okwenziwe ngabadlali bakhe njalo akethuki lutho mhla abafana bakhe bengqikilana lamathimu akwamanye amazwe.
“Sengikhangele okuphambili ngoba ukulungiselela kwethu imidlalo yeConfederations Cup ngikuqakathekisa ukwedlula konke khathesi.
“Ukulungisisa ithimu yikho okusehlelweni lwethu njengabaqeqetshi. Inkokheli zethimu sezitsheliwe lokho esifisa ukukwenza kumalungiselelo abo,” kutsho uAntipas.
Umqeqetshi lo uthe iqembu lakhe ulibona lisedlula izigaba zakuqala zomncintiswano weConfederations Cup.
IChicken Inn iphapha phezulu njalo inikezwe imvumo yokuzibiza intshantshu zeCastle PSL ngokunqoba iHarare City 3-0 ngempelaviki.
Nxa iChicken Inn ingadlala ngokufisa komqeqetshi wayo, kuzamele izimisele ukuhlangana lenkunzi zomdlalo ikakhulu lezo ezidlala enyakatho yeAfrica.
Lenkokheli zeChicken Inn zithabe zimanzi ngokubizwa ngentshantshu yenguqu yeZimbabwe.
Umgcinisihlalo wethimu uLifa Ncube uthe iqembu labo selimelele ukwenza izimanga.
“Ngemva kokubona abafana bethu benqoba kuligi yePSL, ngizizwa ngijabulile. Akula umgcinisihlalo wenguqu othabe ukwedlula mina,” kutsho uNcube esecingweni.
Kusenjalo, uNcube uthe bazasebenzelana lomqeqetshi, benze konke okufunwa liqembu kumalungiselelo.
Uthe kayibuyeli emuva ngokulolonga njalo kungenzeka ukuthi kube lenkamba yokulolonga ngaphandle kwelizwe.
“Siphakathi kokubonisana labaqeqetshi bethu, mhlawumbe ithimu ingalolonga okwesikhathi esithile ingaphandle kwelizwe. Lokhu sokwenza sikhangelele ukuthi abadlali bajwayele ezinye inkundla zeAfrica. “Sizabona okuzavuma, inhloso yikulungiselela lokwenza umbono wabaqeqetshi.”
Umgcinisikhwama wethimu uMlungisi Moyo uthe bayafunga ngakho konke abalakho ukuba bazafika kuma-final ayo yonke imincintiswano kusizini ezayo.
“Okwamanje amalungiselelo eAfrica asegiyeni eliphezulu. Lonyaka ngumnyaka wethu. Inguqu edlalwa yiChicken Inn isitshintshile.
“Ngokubona kwami amanye amathimu sizawathwalisa nzima, siqeda umncintiswano weCaf sizabe sesilembali engcono,” kutsho uMoyo.
