uMthunywa
Nkosilathi Sibanda
AKULA iqembu elidlala kuPSL elithole usekelo lwemali ukwedlula eleChicken Inn nanko phela isisebenzelana lenkampani yeNyaradzo Life Assurance phezulu kokuthola njalo olunye usekelo kumankampani amane.
Iqembu lakoBulawayo leli lithengelwe uvava lwebhasi oluzasetshenziswa kumidlalo yonke kulisizini.
Lokhu kube zindaba ezijabulisayo kunkokheli lakuhlekana labalandeli balithimu.
IChicken Inn ibisidonse isikhathi eside iseboleka amabhasi ezikolo.
Umaneja weNyaradzo kulumhlubulo uTendai Kanjanda ubikele intatheli ukuba basalungisisa amaphepha okuletha leyo bhasi.
“IChicken Inn sesiyithengele ibhasi ezasetshenziswa kuyo yonke imidlalo yayo. Sithole imali yakwamanye amazwe yokuthi sithenge ibhasi ngakho okwakhathesi abadlali bazasebenzisa enye ibhasi yethu, kusalindwe entsha,” kutsho uKanjanda.
Amanye amankampani aqala isivumelwano leChicken Inn abalisa iBon Vie Medical Aid Scheme, iBlack Shark Protection Services, Zibuko Capital leNational Foods.
Inkampani yezempilakahle iBon Vie Medical Aid Scheme yahamba phambili kwezinye ngokuzinikela ukunceda abadlali labaqeqetshi nge-medical aid ebiza i$233 986 ngesizini.
Ngokwakuqala kumbali yenguqu yePSL ukuthi kube leqembu elidonsa usekelo kumankampani amahlanu ngasikhathi sinye.
Isikhulumi seBon Vie Medical Aid uThembie Mloyi-Ncube wabika ukuba bayajabula ngokusondela eduzane leChicken Inn. Inkampani yeBlack Shark Protection Services yakhipha i$35 700.
IZibuko Capital ebona ngezomnotho wemali ithembise ukunika isipho kumdlali ozenza kuhle ekupheleni kwazo zonke inyanga kanye lokuthengela iqembu impahla.
Umaqhuzu wePSL uKennedy Ndebele ukhuthaze iChicken Inn ukuthi ibize abalandeli abanengi.
“Iqembu lenu alila balandeli abanengi ngakho ngilikhuthaza ukuba lenze umsebenzi wokudonsa abantu eqenjini.
“Lokho kuzancedisa ukuthi lamankampani afuna ukulisekela abone ukuthi iChicken Inn liqembu elilebizo.”
Umqeqetshi weChicken Inn uJoseph Antipas uxoxe loMthunywa kuliviki waveza ukuthi abasoze badanise.
“Okwenziwa liqembu ngokubambana lamankampani kuyasikhuthaza ukuthi siqhubeke sidlala kuhle,” kutsho lumqeqetshi.
