YiNtatheli kaMthunywa
USIBALUKHULU weChicken Inn uTavengwa Hara ubike ukuba iqembu lakhe liqine okuzwayo njalo labaqeqetshi bayasuthiseka ngabadlali balo asebekhulile.
Amalungiselelo okuphenduka enkundleni aseqalile kuqembu lakoBulawayo leli, elihlose ukuthi lenze ngcono kumncintiswano weligi ezayo.
IChicken Inn izangena kumncintiswano ohlelwe yiPremier Soccer League, okhangelelwe ukuthi uqale ngoNkwenkwezi. Kulumncintiswano, amaqembu akoBulawayo azadlala wodwa, anduba kutholakale intshantshu ezakuyadibana lezinye intshantshu zakwamanye amadolobho.
Kumalungiselelo omdlalo la, iChicken Inn ibika ngokujabula ukuthi ithembe inyawo zabadlali asebekhulile ngeminyaka ababalisela uGuide Goddard, Ian Nekati, Passmore Bernard loMoses Jackson.
Abadlali laba kubikwa ababoni elinye ikhaya ngaphandle kweChicken Inn.
UHara uthe akulanto ejabulisa njengalokhu.
“Njengoba sizaqala amalungiselelo ethu, silokuthaba ukubika ukuba inengi labadlali bethu likhona,” kutsho uHara.
“Iqembu liqoqekile njalo labaqeqetshi bayasuthiseka ngokuba khona kwabadlali asebedonse iminyaka eminengi bedlala. Abaqeqetshi balethemba ebafaneni laba.”
UHara uthe loba inguqu isiyaqalisa kunyanga ezizayo, kumqoka ukuthi amaqembu akhuthaze abadlali ukuthi benqabele igcikwane le-Covid 19.
“Impilo iqakatheke ukwedlula ibhola. Asiqhubekeni sinakekela impilo zethu, siziphathe kuhle.”