uMthunywa
YiNtatheli kaMthunywa
LISUKILE iqula labadlali beChicken Inn liqonde ezweni leMalawi lapho elizangqikilana lamaqembu amane akulelo kumqhudelwano we-Energem International Bonanza.
Umqhudelwano lo okubikwa uqoqwe ngemali ebiza i-5 million kwacha, uzaqhutshelwa enkundleni yeKamuzu Stadium edolobheni leBlantyre kusukela ngoLwesihlanu kusiya fika ngeSonto.
IChicken Inn izalwela inkezo le lamaqembu atshisayo abalisa iUD Songo yaseMozambique, BE Forward Wanderers leNyasa Big Bullets.
Ekhuluma lentatheli kaMthunywa andubana balubhekise eMalawi ngoLwesibili emini, unobhala weChicken Inn uTawenga Hara uthe balande ukuyanqoba.
“Siphenduka layo inkezo khathesi. Silungiselele saphelela ukuthi sithathe imidlalo le njengenkundla zokuthi silolongele lesizini yethu ezaqala kumalanga alandelayo,” kutsho uHara.
Umqeqetshi uJoey Antipas uthe kuye uhambo lwabo ngolokuyaqinisa iqembu.
“Lithuba lokuthi sibone indlela esiqine ngayo lokuthi sihlaziye iqembu njengoba isizini isisondele. Imidlalo enjengale inceda kakhulu abadlali bethu abatsha ukuthi bahlale besazi ukuthi umncintiswano ubanjwa njani, ikakhulu nxa bedlala lamaqembu akwamanye amazwe
IChicken Inn iqale ukulungiselela isizini inxuswa eZambia ngomnyaka ka-2016 lapho eyancintisana khona leAzam yaseTanzania, iZesco United leZanaco. Ngo-2017 yaphindela njalo idibana le-Zanaco leNkana Red Devils.
