uMthunywa
Wayne Ncube
BAQALA ngokuduma kuTwitter khathesi sebeguqula iqembu lisiba libhizimusi ngokuvula isitolo.
Yikho lokho okwenziwa yiBulawayo Chiefs, iqembu elihlala lisadalala kuligi yeCastle Lager kodwa lisenza kuhle kwezinye izinto.
Okwakhathesi leliqembu seliseduzane lokuthi livule isitolo sempahla yayo, okungakaze kwenziwe ngamanye amaqembu aselempande kunguqu yakuleli. Inkokheli zethimu le zitshele uMthunywa ukuba sesifikile isikhathi sokuvulwa kwesitolo sempahla yeqembu labo njalo bagcwalisisa isicelo sabalandeli.
Iqembu leBulawayo Chiefs lithembise abalandeli balo isitolo sempahla esizavulwa maduzane elokitshini lakoBulawayo kulandela isicelo sokuthi iqembu lenze icebo kutholakale impahla zabalandeli beqembu.
Ekhuluma lentatheli uJavas Sibanda onguye oqhuba inhlelo zokuvulwa kwesitolo lesi i-Total Chiefs Merchandise Shop, ubike ukuthi iqembu likhangelele ukusungula isitolo lesi maduzane ngaphambilini kokuba imidlalo yomnyaka omutsha webhola iqale.
“Abalandeli sizabanika isitolo sempahla osokulesikhathi besifuna, isitolo lesi sizakuba edolobheni lakoBulawayo kodwa senza ngamandla ukuthi sitholakale lasebulenjini ukuze umlandeli wonke iloba ekuphi enelise ukuthola eyakhe impahla yama “Ninja” ayithandayo.
“Isitolo lesi sizakuba lezikipa zebhola, izikipa zokuzigqokela nje kuzokuthi impahla yonke ehlangane lezemidlalo izatholakala esitolo lesi,” kuchaza uSibanda.
Abalandeli beqembu sebethethe udaba lwabo lokufuna isitolo sivulwe basisa ebulenjini lapho abaveze khona izikhalazo zabo lendlela abatshengisele ngayo ukufuna impahla ezihlobane laMakhosi Amahle.
“Ngilokucabanga ukuthi iqembu lamaNinja leli ngabe belikhona amatshumi amabili eminyaka, umdlalo wenguqu yakuleli ngabe uphakeme kakhulu, sebelethe okuhle ukuzithokozisa emdlalweni webhola,” kuveza omunye wabalandeli uBrighton Ndlovu.
Uqhubekele phambili uSibanda eveza ukuba isitolo lesi sizanceda iqembu emalini kanye lokuthokozisa abalandeli ngento ababekade beyifuna kusukela kudala.
“Akusiyo indlela yokwenza imali kuphela leyi eyokuvula isitolo kodwa lapha sitshaya inyoni ngelitshe elilodwa.
“Iqembu lingaba lenzuzo enhle ngesitolo lesi kuzakuthi abalandeli labo bazathokoza ngoba impahla abazazithola sigijimisa i-quality kuphela okuzabajabulisa,” kuphetha uSibanda.
