uMthunywa
Bongani Ndlovu
BEKULUSUKU lwentokozo ngoMgqibelo ebusuku eZimbabwe International Trade Fair lapho abadlali bakoBulawayo akade benikwa indondo zokwenza kuhle emisebenzini yabo kumcimbi wamaRoil Bulawayo Arts Awards 2019.
Iqembu le-Inkululeko Yabatsha School of Arts (Iyasa) lihambe phambili kwezomgido koBulawayo ngemva kokuba lithanyele indondo ezintathu zama-Dance Awards.
Ukunconywa komsebenzi we-Iyasa kuveze sobala ukuthi ukusebenza gadalala kulempumela enhle nanko phela nyakenye indondo lezi zathathwa ngamaqembu athi iKhaya Arts le-Ezimnyama Dance Ensemble.
Iqembu le Iyasa libuye ngomfutho omkhulu kwezomgido nanko phela lenelise ukuthi libuthe indondo zonke kwezemigido kusukela ku-Outstanding Male Dancer ethethwe nguNewman Gondwe, kwabuya i-Outstanding Female Dancer ethethwe nguLethokuhle Ncube basebedlulela ukuyathatha enkulu yakhona indondo eye-Outstanding Contemporary Dance Ensemble abayithethe beliqembu le-Iyasa.
Inthatheli kaMthunywa ikhulumisane lentshantshu yokugida uNewman Gondwe obelokukhulu ukujabula.
“Ngijabule kakhulu ngendondo yangempelaviki ngoba kutshengisa ukuthi bakhona abantu abalandela umsebenzi wami njalo lokuthi lami kukhona engikwenza kuhle emsebenzini wami,” kutsho uGondwe.
Uqhubekele phambili waveza ukuba indondo lezi ziwuqinisile umkhosi weqembu wokuhamba phambili kweleZimbabwe leAfrica.
“Ngemva kokuthatha indondo zangoMgqibelo sesikhangele phambili ukuze singawisi iphika siqhubeke sisebenza nzima njalo sisenza kuhle ukuze ibizo le-Iyasa lingatshabalali,” kuveza uGondwe.
Uphethe ngokuthi inhloso yakusasa isikhangelele ekukhuliseni ikusasa labagidayo.
“Khathesi zikhona izikolo ezimbalwa zakoBulawayo engisebenzisana lazo ukuqeqetsha abafundi babo kusukela kubanga laphansi lika 0 kusiya kubanga lesikhombisa ukuze labo babone ubuhle bokugida lama-Arts,” kuphetha uNewman “Maswelamathambo” Gondwe.
