Wayne Ncube
LIKHULA lisiya phambili ikolitshi le-Chess Mates Academy ekulolongeni abadlali be-chess nanko phela selibambane leBulilima District Chess, ukuze kwande abafundi abaphatheka kulumdlalo.
Ikolitshi leli elikhokhelwa nguPrisca Sibanda lincedise ekwakheni udumo lomdlalo lo kulesi isigaba kumncintiswano wabantwana besikolo eThekwane High School. Izikolo ezikulindawo eziyisitshiya galombili zithumele abadlali lapho obekudingwa intshantshu kuzwa ezizamela isigaba lesi kunkundla eziphezulu.
Izikolo lezi zibalisa i-Usher High School, Solusi High School, Phakama Secondary School, Ntunungwe Secondary School, Gwambe High School, Tokwana Secondary School leThekwane High School.
Ngaphandle kokudinga ithalenta, le bekuyinkundla yokuthi kubunjwe inhlelo zokulolonga abantwana abakhuthalele umdlalo we-Chess.
Isigaba seBulilima lesi sikhangelele ukuthi kukhethwe iqula labadlali abazafika benze okuhle kumncintiswano ozabe usesikolo se-Plumtree High ngoMabasa.
Intatheli ikhulumisane lomqondisi we-Chess Mates Academy, uSibanda othe ukuqoqwa komdlalo weChess eBulilima, kuyisiqalo sokumemethekisa umdlalo indawo yonke.
“Ngithanda ukutshayela izandla ababalisi besigaba seBulilima ngokuphakamisa umdlalo weChess. Izikolo ziyinsika ekulolongeni ithalenta ngakho kumele zisekelwe”
Uthe ikolitshi lakhe leChess Mates lizaphathisa kakhulu ekuvuleni amaqembu adlala lumdlalo.
“IChess Mates Academy izasekela ngalokho elakho ukuze umdlalo ukhwabithwe ngabanengi ezikolo. Sifuna ukuletha inguquko kubadlali ngokubanikeza ithuba lokuzibonakalisa. Mhlawumbe singathola abadlali abazamela isizwe bephuma kulindawo,” kutsho uSibanda.
USibanda uqhubeke wathi kubalulekile ukuthi izikolo zeBulilima zikhuthaze amankazana ukuthi adlale iChess.
“Kubalulekile ukuba sonke sikhwabithe umdlalo lo. Kudingeka ukuthi labantwana abangamankazana bazithuthukise kulumdlalo ngoba uvula amadlelo aluhlaza empilweni.
“Inhlanganiso yethu yeChess Mate Academy ivulelwe iloba ngubani ukuba abuye azokuba yingxenye yabafundi beChess,” kulandisa uSibanda.
Ekhuluma lentatheli umgcinisihlalo weNational Association of Secondary Heads (Nash) eBulilima, uVusumuzi Ncube ubike ukuba bazasukumela phezulu basebenzelane leChess Mates Academy.
“Isigaba seBulilima sizasebenza lenhlanganiso yeChess Mate Academy ukwenzela ukuthi sithuthukise umdlalo weChess. Sikhangelele ukuthi abantwabethu bafunde okunengi.”
Egcizelela, uSibanda ubike ukuba inhlanganiso yakhe ikhangelele ukuvula olunye ugatsha lweChess Mates Academy edolobheni lePlumtree oluzafinyelelisa imfundiso yeChess kubantwana abangekho koBulawayo.
“Sizimisele ukuvula olunye ugaja ngoba akusuye wonke umfundi owenelisa ukuba lathi koBulawayo.”
Izikolo ezinengi emakhaya ziyehluleka ukuthenga ama-chess boards ngakho inhlanganiso leyi ikhangelelwe ukuba incedise ukuthuthukisa umdlalo lowu ngendlela ezehlukeneyo.
Umncintiswano weBulilima lo uphele ngomdlalo lapho uFortune Zvinoira athole ithuba lokudlalela isicoco seChess Board encintisana labadlali beChess Academy lapho ayehluleke khona ukunqoba loba nje ecine esiphiwe lesi isipho.