IBosso leChicken Inn ziyakhokhela

24 May, 2021 - 16:05 0 Views
IBosso leChicken Inn ziyakhokhela U Washington "Navara" Navaya ohlohle kumdlalo weHighlanders le Bulawayo Chiefs

uMthunywa

Nkosilathi Sibanda

AMAQEMBU womdlalo wenguqu koBulawayo iHighlanders le Chicken Inn anqobile kumidlalo yawo yakuqala kumkhankaso wenkezo yeChibuku Super.

IChicken Inn ihlohle amabhola amabili eqandeni phezu kweBulawayo City kumdlalo ovule inkundla yeBarbourfields ngoMgqibelo.

I-City ifice zibotshiwe komakhelwane okokuthi lomqeqetshi wayo uPhilani Ncube uvumile ukuba abafana bakhe bebengekho emdlalweni.

“Umdlalo wethu wakuqala ngemva kwesikhathi eside awuhambanga ngendlela ebesifuna ngayo,” kutsho Ncube ngemva komdlalo.

Umqeqetshi weChicken Inn uJoey Antipas uthe akasoke enze iphutha elizaphazamisa ukuzimisela kwabadlali bakhe.

“Wonke umuntu kuChicken Inn uyayifuna inkezo. Abadlali balentshukuntsho, angeke ngibalahlise.”

IBulawayo City izadibana leBulawayo Chiefs kumdlalo olandelayo ngoMgqibelo.

Amakhosi alungiselela umdlalo  lo evela nqotshwa 1-0 yiHighlanders ngeSonto.

Okuzahlabusa ngemidlalo ezayo kuqula lika-B kunkezo yeChibuku Super kuza kuba yikudibana kweChicken Inn leHighlanders. Zombili zikhangelelwe ukuthi ziqhubekele phambili kulinkezo.

IBulawayo Chiefs ibilabadlali abalandelayo uDavid Bizabani, Phelius Sibanda (Isaac Badu 77th minute), Gift Gumbo, Marlvin Mkolo, Ben Nyahunzwi, Joe Nyabinde, Lucky Ndlela (Billy Veremu 74th minute), Desire Shumbanhete (Samuel Antwi 46th minute), Arthur Musiyiwa, Fredrick Muza (Hughe Chikosa 46th minute), Farawu Matare.

Highlanders: Future Sibanda, Crispen Ncube, Mbongeni Ndlovu, Andrew Tandi, Andrew Mbeba, Nqobizitha Masuku, Adrian Silla, Divine Mhindirira, Ray Lunga (Bukhosi Sibanda 89th minute), Godfrey Makaruse (Toto Banda 70th minute), Washington Navaya (Muziwethu Dhlamini 89th minute)

Share This:

Sponsored Links