uMthunywa
Nkosilathi Sibanda
IHIGHLANDERS isisungule umkhankaso obizwa ngokuthi yiSoccer4her, onxusa abesifazane ukuthi bangene kuzihlalo zombuso waleli iqembu.
Umkhankaso uza ngesikhathi iqembu leHighlanders lithakazelela ukufikisa imnyaka engu-95. Umbono wokuvula lumkhankaso uvela ngemva kokunanzelela kwamalunga eqembu ukuthi akula muntu wesifazane okhwabitha ukuvotelwa kubukhokheli beqembu kumbe ukuba lilunga eliphakemeyo.
Umkhankaso lo usuthole usekelo njalo ngesikhathi kunanzwa ukuqakatheka kwabesifazane kulinyanga kaMbimbitho.
Inkokheli zethimu kubikwa ukuba zikhathazekile njalo ngokuhlukunyezwa kwabomama enkundleni zomdlalo.
Kumidlalo yeHighlanders sekusaziwa ukuthi abesifazane baphathwa kubi, osekudale ukuthi inengi lingazihluphi ngokusekela iqembu.
Iqembu leli libike ukuba selifuna ukubumba kutsha inhlelo zalo zokuxhasa abesifazane ngokusungula iSoccer4her.
Isikhulumi seHighlanders uRonald Moyo uthe injongo yeSoccer4her ngeyokusondeza abesifazane eduzane leqembu.
“Sizasungula uhlelo lweSoccer4her kunsuku ezimbalwa ezizayo, sihlose ukuthi sidinge usekelo kwabesifazane,” kutsho uMoyo.
“Sinanzelela ukuthi umdlalo wenguqu ugcwele abantu besilisa. Nxa abesifazane bekhethe ukuza enkundleni bathwala nzima ngokuthethiswa lokungatholi inhlonipho. Sifuna ukutshintsha konke lokhu.”
