uMthunywa
Nkosilathi Sibanda
KUBE ngumbiko ongene kuhle endlebeni zabalandeli beqembu leHighlanders besizwa ukuba abadlali bazathola amajesi abunjwe ngeyinye inkampani.
IHighlanders ibigqoka i-kit eyathungwa yi-Roar, ethe isethula ijesi layo ngesizini ka-2019, kwasola wonke umuntu. Bazonda abalandeli besithi i-kit le imbi kakhulu.
Kuliviki kuphume imbiko yasabalala ukuthi iBosso isizagqoka ijesi elithungwe yinkampani ye-Umbro. Ijesi leli loba lingakavezwa ngokusemthethweni, selenze abalandeli baqala ukunyakazela ngemifanekiso ebulenjini, bethumela lokho abacabangela ukuthi kungabe kuyiyo i-kit ye-Umbro.
Abafakazi abaqotho babikele iphephandaba likazulu ukuthi izikhulu zeBosso ziphakathi kokuxoxisana leziphathamandla ze-Umbro, inkampani yaseNgilandi kusivumelwano esitsha.
“Liqiniso elingafihlwayo leli. IHighlanders isitshiyane le-kit ye-Roar Ngikhuluma nje abadala basengxoxweni lenkampani ethile ezathunga impahla yakulisizini,” kutsho omunye wabafakazi abathenjiweyo.
Isikhulumi seHighlanders uRonald Moyo kabambekanga ecingweni ngesikhathi kudingwa ilizwi lehofisi yakhe.
Ezitaladeni abalandeli bathe nxa sekunjalo, sebengalithenga ijesi elitsha.
“I-kit yethimu yethu ingabuya inhle ngoba yenziwa yinkampani elophawu olwaziwa ngobuhle, hatshi lokhu ebesilakho ngo-2019,” kutsho uThabani Ndlovu osekela iBosso ehlala eNtabazinduna.
Abalandeli bathe impahla yonke entsha eyeqembu ayitholakale ezitolo.
“Nxa beqinisile ukuthi kuzathungwa i-kit entsha, kuhle ukuthi benze amajesi afinyelele lathi abalandeli. Le entsha singathenga sibili,” kubika uThembelihle Ncube koBulawayo.
Loba kubajabulisa ukuthi sekuzakuba lempahla entsha, abalandeli bathe kwelizayo inkokheli zeqembu azidinge umbono wamalunga kuqala.
