uMthunywa
Nkosilathi Sibanda
UMONGAMELI welizwe uEmmerson Mnangagwa labanye abalandeli beHighlanders baba yinsika yokuthi iqembu leli lithole ichence lemvumo yokwemba igolide, kutsho umgcinisihlalo uKenneth Mhlophe.
IHighlanders ngoMpalakazi ithole imvumo evela kugatsha lwezemigodi lokuthuthukiswa kwezokwemba, ukuthi iqalise ukugebha umhlaba idinga igolide esigabeni seBubi.
Kubezindaba ezimnandi kubalandeli labathandi beHighlanders abatshayele uMhlophe ihlombe bebika ukuthi ukuba lomgodi wegolide sekunikeze iqembu inhlonipho lokuzethemba ukuthi alisoke lahlutshwa yimali kwelizayo.
UMhlophe, ekhuluma lephephandaba likazulu uthe ukuqala ukugejwa kwegolide kuzakhulula iqembu.
Uthe ukuzimisela kwabasekeli lokuthola usekelo olukhulu kumongameli welizwe losibalukhulu wakoBulawayo uJudith Ncube, yikho okwenze iBosso yaphumelela.
Kubikwa ngemva kokunanzelela ukoma kwesimo seHighlanders, uJudith Ncube wafuqa ukuthi isicelo seqembu samukelwe ngokuphangisa.
“IHighlanders yethula isibongo kumongameli uEmmerson Mnangagwa, kuHulumende weZimbabwe, abasunguli benyathelo lokuvula umgodi wegolide, umphathi kaHulumende koBulawayo uJudith Ncube labalandeli,” kutsho uMhlophe.
“Loba nini sesingaqalisa ukwemba igolide. Umgodi lo kumele ubonakale njengesikhwama seqembu. Yikho lapho iqembu elizathola khona imali yokuthi iqembu liphumelele njengebhizimusi.”
