uMthunywa
YiNtatheli kaMthunywa
INKAMPANI yeDelta Beverages isibike ukuba izimisele ukusekela imidlalo yeZimbabwe Tertiary Institutions Sports Union (ZTISU) kumkhankaso wayo wokuthuthukisa ithalenta kwezemidlalo emakolitshini lasemanyuvesi.
Imidlalo yeZTISU yalonyaka iqhutshelwe koBulawayo. Imncintiswano yemidlalo le iqale ngoLwesibili yaze yaphela ngoLwesihlanu ngeviki edluleyo. Idolobho lakoBulawayo beliphithizela njengoba bekudibene amakolitshi edlula amatshumi amane.
Imidlalo iqhutshelwe kunkundla eziyisitshiya galombili. Imidlalo le iqoqwe zinhlanganiso ezintathu ezigoqela iTechnical Education Sports Association of Zimbabwe (TESAZ), iZimbabwe Teachers’ Colleges Sports Association (ZITCOSA) kanye leZimbabwe Universities Sports Association (ZUSA).
EWhite City bekulomdlalo wokugijima. Ibhola likanobhutshuzwayo belidlalelwa eBarbourfields, ibasketball (eKhanyisile) Volleyball le-handball bekudlalelwa e-United College of Education.
Eminye imidlalo encintiselweyo ahlanganisela ibhola lombhoxo enkundleni yeHartsfield, ithenisi (BAC), pool (Queens Sports Club). Ama-darts, ithenisi yetafula kanye le-chess bekubanjelwe e-Hillside Teachers College.
Kumbiko wayo, ethunyelwe iphephandaba likazulu, iDelta Beverages iqinisekise ukuthi izasekela imidlalo njengoba ifuna ukuqinisa ukubakhona kwayo ekuthuthukiseni ithalenta lezemidlalo.
Ngokusebenzisa iCarling Black Label, inkampani le isixhase imidlalo emakolitshini okweminyaka emithathu.
iCarling Black Label
“ICarling Black Label izaqhubeka isekela intshantshu zemidlalo kulumncintiswano. Bonke abanqobileyo banikwe izicoco,” kubika iDelta Beverages.
“Ngaphezu kwalokhu sizaphinda sixhase amaqembu amabili afinyelele kuma-final, azamela ilizwe kumidlalo ebalisa irugby, netaball, volleyball le-basketball kumqhudelwano we- Confederation of Universities College Sports Association.”
Imidlalo yeZTISU isetshenziswa njengenkundla zokuhlanganisa abadlali abazamela ilizwe kumidlalo yeConfederation of Universities College Sports Association ozaqhutshwa kusukela mhlaka 28 Ncwabakazi kusiya ku-3 Mpandula eMozambique.
Amazwe azadibana agoqela iZimbabwe, Namibia, Lesotho, Angola, Eswatini, Zambia, Malawi leMozambique.
