uMthunywa
YiNtatheli kaMthunywa
UKUTSHONELA ukukhuluma kuTwitter akuyincedanga iBulawayo Chiefs ngesikhathi inqotshwa 5-0 liqembu leChapungu kumdlalo wokuqala kuligi yeCastle Lager, okutshiye iqembu lakoNtuthu leli libelethe inhloni.
Kunguqu yePSL kulivelakanci ukuzwa ukuthi kuleqembu elitshaywa amabhola amahlanu lehluleke ukuphendula kumdlalo wokuvula isizini.
I-Bulawayo Chiefs ingabe ilobe imbali ezathatha isikhathi eside ukuthi yesulwe kunguqu ephakemeyo.
Kulabo ababukele lumdlalo, kwabonakala ukuthi iChiefs isalomango wokuthi ilolonge ngokuqinileyo bonke abadlali bayo.
Inkinga ekhangelane laleliqembu yikuthi abadlali bayo bayaxega.
Lomqondisi weqembu uLovemore Sibanda uyakuvuma ukuthi abadlali bakhe bathambile.
USibanda uzwakale engajabulanga ekuthini iqembu elinjengelakhe liyangiswe yiChapungu.
Kulandela ukubhaxabulwa enkabazwe, umqondisi weChiefs wazise iphephandaba likazulu ukuba useqhatshe uThulani Sibanda ukuze alolonge abadlali.
“Abaqinanga ngitsho abafana. Kukhona okusilelayo. Kumele baqiniswe imizimba, bagijinyiswe okuzwayo, yikho sesibize uThulani Sibanda ukuthi abaqeqetshe lapho,” kutsho uSibanda.
