uMthunywa
YiNtatheli kaMthunywa
ISIMO somnotho kuleli kukhanya sesihlasele lokuqoqwa kwezemidlalo kuleli nanko phela inkezo evula isizini yenguqu izadlalelwa ngamaqembu amabili kuphela.
Kuminyaka edluleyo, inkezo le eyaziwa ngokuthi yiZNA Charity Cup ibilamathimu amane ancintisanayo, kodwa abaqoqi bayo, ibutho lesizwe, babike ukuba lokho angeke bakwenelise kulisizini.
Lezi zindaba ezinhle kubathandi labalandeli benguqu koBulawayo ngoba ibutho lesizwe selikhethe ukuthi inkezo le incintiselwe yiHighlanders leChicken Inn kuphela.
Zombili zidibana mhlaka 10 kuMbimbitho.
Iphephandaba likazulu lixhumane lonobhala wenhlanganiso yeArmy Charities uLieutenant-Colonel Chitungo othe ngemva kokuhlolisisa kwabo, bakubone kufanele ukuthi banxuse amaqembu akoBulawayo la.
“Ngemva kokukhangelisisa lokuhlolisisa esikwenzileyo, kubelicebo elihle lokuthi kudlale amaqembu amabili akoBulawayo. Sivumelane ukuthi kudlale iHighlanders leChicken Inn.”
Uthe ibutho lidinga imali engafika i$20 000.
“Ensukwini ezimbalwa ezilandelayo sizabika isilinganiso semali ezabhadalwa ngababukeli mhla welanga lomdlalo. Mhlalokho sizakutsho lesisindo somvuzo njalo.”
Kulumdlalo kukhangelwe ukuthi kuzagcwala kuthi phamu eBarbourfields ngenxa yokuthi abalandeli bamathimu womabili bazafuna ukubona iqula labadlali eliqoqwe ngamathimu womabili.
IHighlanders leChicken Inn zadibana kusigaba sama-semi finals ngomnyaka odluleyo lapho iBosso eyanqoba khona nge2-1. EzikaMagebhula zehluleka ukuyithwala inkezo ngokutshaywa 2-0 yiDynamos.
Ngalelolanga kukhangelelwe njalo ukuthi umqeqetshi weBosso uMadinda Ndlovu avule amehlo ngoba iqula leChicken Inn alisoze livume ukwehliswa lona seliyilungiselele ngamandla isizini ka2018.
Umqeqetshi weChicken Inn uJoseph Antipas, ekhuluma loMthunywa ngoLwesithathu uthe kuhle ukuba kuqoqwe umdlalo wokukhangelisisa ukuqina kwabadlali bakhe, ngakho kasoze ayithathe lula inkezo.
“Umdlalo lo usipha idlabuzane ngoba abadlali sebelinde ukuthi bancintise. Sesihlanganise abadlali esilethemba lokuthi bazadlala inguqu emnandi,” nguAntipas lo.
Umbiko ophuma kubaqoqi benkezo yeZNA Charities ukhuthaza ababukeli bomdlalo ukuthi bagcwale ngobunengi babo Emagumeni ngenhloso ephezulu kokukholisa umdlalo kodwa eyokuthi kudingwe imali yokuncedisa ibutho liqhube inhlelo zayo zokuphathisa abaswelayo.
Kusenjalo, iChicken Inn iya eMalawi kumqhudelwano wamaqembu amane.
AmaGamecocks yilo lodwa iqembu leZimbabwe elizadlala njalo kumdlalo wakuqala lidibaniswe leNyasa Big Bullets.
