Uncategorized

I-Zimpapers itshintsha abaphathi benkampani

20 Jan, 2025 - 14:01 0 Views
I-Zimpapers itshintsha abaphathi benkampani

YiNtatheli kaMthunywa
IBHODI yenkampani yeZimpapers isibike ngokutshiya umsebenzi kukamaqhuzu wenkampani, uMnumzana Pikirayi Deketeke, umaqhuzu wezemali uMnumzana Farai Matanhire, kunye lomaqhuzu wezokuthengisa uMnumzana Tapuwa Mandimutsira kulandela ukuphela kwezivumelwano zabo.
Izikhulu ezintathu lezi okwakhathesi zikukhefu, ngesikhathi zilinde izaziso zokuphela komsebenzi wazo.
Ibhodi isikhethe uMhleli omkhulu wenkampani uMnumzana William Chikoto ukuthi abambe isikhundla sikamaqhuzu. UNkosikazi Annah Kufakunesu uzabamba iwofisi yezokuphathwa kwezimali.
Umgcinisihlalo webhodi, uNkosikazi Doreen Sibanda uthe: “Siyabonga ukuzinikela okutshengiswe nguMnumzana Deketeke, uMnumzana Matanhire loMnumzana Mandimutsira eminyakeni edluleyo.
“Njengoba beqhubekela phambili ngempilo entsha, sidlulisa ukubonga kwethu okusuka enhliziyweni njalo sibafisela okuhle ngekusasa labo.
“Njengoba sivalelisa abaphathi laba, sizimisele ukuqhuba kuhle umsebenzi ngaphansi kwabaphathi abatsha.”
Uthe uChikoto ukulungele ukuqondisa iZimpapers kulesi sikhathi senguquko ngenxa yolwazi lwakhe olunengi kunye lokwazisisa kwakhe ibhizimusi.
Uthe uNkkz Kufakunesu ulolwazi olunengi kwezezimali njalo kulobufakazi obubambekayo bokuphatha imali kakuhle.
“Silethemba lokuthi ubukhokheli bakhe buzaqhubeka ngokuphakamisa izinga eliphezulu lokuphathwa kwemali lokukhula kwenkampani,” kutsho uNkk Sibanda.
“I-Zimpapers iqhubekela phambili ngenyathelo layo lokuguquka, igxila kundlela zakulezinsuku zokuhambisa indaba, i-digital transformation lokwengeza isithunzi senkampani emakethe ukuze kuqinisekiswe ukukhula kanye lokusungula inhlelo ezintsha. Ukuzimisela kwethu ekusebenziseni imitshina yakulezinsuku lokuthuthukisa ukuzwisisa kwabathengi bethu kuhlala kuphezulu.
“Siyajabula ngethemba esilalo ngekusasa lethu lamathuba azakuba khona. Siqinisekisa ama-stakeholders ethu ukuthi inkampani isezandleni ezinhle njalo ikulungele ukuqhubeka ngempumelelo.”
UMnu Deketeke ubengumaqhuzu ngoMabasa ka-2015 njalo ukhokhele inkampani kunhlelo ezinengi ezihlanganisela ukwehlukanisa ibhizimusi leZimpapers ekubeni ingabi yinkampani yamaphephandaba kuphela kodwa iphathe ibhizimusi elahlukileyo.
Ngaphansi kwakhe, iZimpapers iqinise indawo yayo njengenkokheli emakethe njalo futhi yandise inyathelo layo kwezomsakazo ehamba phambili iStar FM leDiamond FM.
Inkampani le iphinde yangena kumabonakude ngokusungula iZimpapers Television Network.
Usebenze kuZimpapers iminyaka engu-37 ikanti phambilini uke waba nguMhleli weHerald, uMhleli omkhulu wenkampani lokuba ngu-Chief Operating Officer.
UMnu Chikoto useke wasebenza njengoMhleli weHerald waphinda waba nguMhleli we-The Sunday Mail.
Okwakhathesi uphezulu kokukhokhela ukuguqulwa kwendlela okusabalaliswa ngayo indaba, olwe-digital transformation.

Share This:

Sponsored Links