uMthunywa
Wayne Ncube
NGENHLOSO yokuphathisa abasakhulayo ukuthi baveze izipho zabo emphakathini kulembongi edabuka eNkayi esisungule umcimbi wokudinga abalamathalenta emaphandleni, i-Talent Search Show in Development Empowering Rural Schools.
ULizom Ncube oleminyaka yokuzalwa engu-(21) ongumfundi eLupane State University usetshengisele ukuba yimbongi lokuba ngumlobi okhathalela abanye abasakhulayo abalesipho esifana lesakhe.
Ekhuluma loMthunywa ubike ukuba waqala ukufuna ukuba yimbongi lokuba ngumlobi ngesikhathi eqala izifundo zaphezulu (Fomu 1) eMateme Secondary School lapho okuqale khona uhlelo lweTalent Search.
“Ngaqala lindaba yokuba ngumlobi lokuba yimbongi kudala nginguFomu 1 kodwa ngaswela ithuba lokubonakalisa isipho sami ngaleso sikhathi.
“Ngokuya kwesikhathi ngahlangana lomlobi uMihla Sitsha owangixhasa kakhulu kuhambo lwami lokuba ngumlobi. Lokhu kwangipha igunya lokuthi ngiqhubekele phambili ngesipho sami njalo ngibelesifiso sokuphathisa abatsha abangabe belezipho kodwa beswela ukuthi bangazibonakalisa njani.
“Indlela engaqala ngayo ukuloba lokuba yimbongi kwabayindlela enzima kungakho-ke ngithanda ukwenza kubelula ukuthi abatsha batshengisele amathalenta abo, yikho ngaqala uhlelo lweTalent Search kuvulwa izikolo,” kuchaza uNcube.
Uqhubeke walandisa ngezifiso zakhe zokubona uhlelo lolu luthola abaxhasi ukwenzela ukunceda abantwana ezikolo ezinengi abalezipho zobuciko bokubukwa lokuthokozisa.
“Mina isifiso sami yikubona impumela enhle kwezobuciko ngakho uhlelo lolu lungathola abantu abangaluxhasa lungafinyelela ezindaweni ezikhatshana kakhulu.
“Okwamanje ngiqhuba uhlelo lokudinda ugwalo ngakho eminyakeni emine elandelayo ngifisa ukuqala inkampani yokudinda yakuqala eNkayi,” kuphetha uNcube.
