uMthunywa
Blessing Moyo
ABABONA ngezokulima baxwayisa abalimi ukuba baqalise ukuphatheka ekulimeni i-sunflower bazitshayele imali enhle.
Ekhuluma loMthunywa uMatabeleland North Provincial Officer osebenza kunhlanganiso yeAgritex, uMnunzana uDumisani Nyoni uthe i-sunflower yisilimo esingahluphiyo ukulima njalo esingadingi amanzi amanengi.
Uthe isilimo lesi senza kuhle kakhulu emhlabathini ovundileyo njalo endaweni elesikhudumezi.
“Umlimi kumele atshonise amagodi akhe abe yi-2cm kusiya ku-5cm nxa ehlanyelo kube sekusithi amagodi lawa atshiyane ngemitha eyodwa emzileni.
“Kuqakathekile njalo ukuba umlimi aqale aphendule umhlabathi wakhe engakahlanyeli i-sunflower ukuze impande zesilimo sakhe zisabalale santando emhlabathi yikho ukuthi isilimo lesi senze kuhle.
“Impande zesilimo lesi zinde kungakho nxa umhlabathi uphenduliwe ziyenelisa ukutshona okwenza kubelula ukuthi sidonse amanzi emhlabathini lokudla. Umlimi kumele abone ukuthi uyafaka umquba oweneleyo njalo,” kulandisa uMnu Nyoni.
Okuhle ngesilimo lesi yikuthi siyavuma ukulimeka kundawana zonke zelizwe.
Uqhubeke echaza ukuthi isilimo lesi asihluphi kakhulu ngoba asidingi amanzi amanengi, futhi umlimi engenelisa ukusilima ngokuthelezela.
“Isilimo lesi asihluphi ukulima ngoba asingadingi amanzi amanengi futhi sona ngokwaso asifuni amanzi amanengi, umlimi angenelisa ukulima ngezulu kumbe njalo alime ngokuthelezela.
Uphethe ngokuthi abalimi kumele bananzelele inyoni ukuze zingaphambanisi zicine sezidle abantwana besilimo sakhe, umlimi acine engatholanga inzuzo abeyikhangelele.
“Inyoni ziludubo ikakhulu isilimo lesi sesisiya vuthwa ngakho ngixwayisa abalimi ukuba bazikhangele zingaboneli isilimo sabo,” kuphetha uMnu Nyoni.
