uMthunywa
Blessing Moyo
ABALIMI bakhuthazwa ukuba bafuye inkomo zomhlobo we-simmmental ngoba kuzinkomo ezilohlonzi njalo ezizala kakhulu loba sezindala futhi ziyamelana lomumo womkhathi wakuleli.
UMnunzana Cosmas Muzunde onguLivestock Officer kunhlanganiso yeLivestock Production Development ukhuthaze abalimi ukuthi bafuye inkomo zomhlobo we-simmental ukuze bathuthukise ibhizimusi yabo yenkomo zochago kunye leyenkomo zokuthengisa ukuze babe lenzuzo ephezulu.
“Ngikhuthaza abalimi ukuba bafuye umhlobo wenkomo ze-simmental ukuze bathole inzuzo enhle ngoba umhlobo lo, wenkomo uyehlisa kakhulu. Okunye njalo umhlobo lo wenkomo ngezingahluphiyo ukugcina kunye lokwelusa,” kuchaza uMnu Muzunde.
UMnumzana Cosmas Muzunde
Uqhubeke echaza ukuthi inkomo lezi ziyehlisa kakhulu futhi zilenyama enengi okuchaza ukuthi umlimi engathola inzuzo emangalisayo ngokuthengisa uchago kunye lokuzithengisa.
“Inkomo lezi ziyazala okumangalisayo loba sezindala azilahlupho njengeminye imihlobo yenkomo eziba lohlupho ekuzaleni nxa sezikhulile. Lesi ngesinye sezizatho zokuthi umlimi afuye inkomo zomhlobo lo.
“Inkomo zomhlobo weSimmental zinkomo ezenelisa ukumelana lomqando njalo futhi ziyaphangisa ukukhula zibe lesisindo esenza umlimi abe lenzuzo emangalisayo ngoba zandise ukuba yi-900kg kuthi inkunzi yakhona ekhulileyo ingaba yi-1300kg nxa esethengisa emkambo,” nguMnu Muzunde lowu.
UMnu Muzunde uphethe ngokuthi umhlobo wenkomo lezi wehlukene kakhulu leminye imihlobo yenkomo ngoba leyo mihlobo yandise ukuba ngumhlobo wenyama kuphela kumbe uchago kodwa-ke lo umhlobo ulakho konke kokubili okungenza umlimi azitshayele imali yakhe.
