uMthunywa
Thando Dube
ABALANDELI bomculo wembube sebethenjiswe ukudla kwendlebe kanye lamehlo kumcimbi wembube iRise Up Chothoza Mfana ozakuba khona mhlaka 11 Ncwabakazi.
Umcimbi lo osuleminyaka emithathu wasungulwayo uzaqhutshwa eBulawayo Theatre lapho amaqembu agoqela iBlack Umfolosi, Ukukhanya Kwezwe, Sunduza, Indosakusa the Morning Star, Men of Influence Great Stars, Ijongosi, Amaqhawe Enkosi, iButho likaKhristu lamanye azabe ethe gwaqa ethokozisa abalandeli.
Umcimbi lo uzahlanganisa amaqembu embube adumileyo kanye lasacathula kungakho uzulu uyanxuswa ukuthi azojabula ngalelilanga.
Ekhuluma loMthunywa uMayibongwe Madihwa oweqembu leKukhanya Kwezwe uthe inhloso yomcimbi lo ngowokuvuselela umculo wembube.
“Umcimbi lo ngowokuvuselela umculo wembube, sihlangene njengamaqembu embube ukuze sazise abalandeli balumculo ukuthi umculo lo usesekhona njalo sizimisele njengabahlabeleli ukuwuthatha siwufake ezingeni eliphezulu.
“Abantu abaze ngobunengi babo bezothokoza lathi kulumcimbi. Sithembisa uzulu uluju lodwa njalo okuhle ngomculo lo yikuthi ingoma zakhona ziqukethe imfundiso enhle ngakho abalandeli ilizwe lonke kabaze bezokholisa,” kuphetha uMadihwa.
