Shingai Dhlamini
Ukuzimisela kuyabhadala!
Yikho lokho okwenziwe liqembu lenguqu yabesifazane, iRea Vaya, nanko seliyintshantsu yomdlalo kuligi yeSouthern Region yesabelo sakoBulawayo.
IRea Vaya ibizwe njengentshantshu ngesikhathi iligi le ibanga emaphethelweni, kusele imidlalo emilutshwane. Iligi igqitshwe mhlaka 9 Lwezi.
Kusenjalo, kubikwa idlabuzane lenjabulo kubambile enkambeni yeRea Vaya. Umqeqetshi weqembu uDanny Ndlovu uthe le bekuyisizini engazange ibelohlupho kibo ngoba badlale kuhle nanko kabazange banqotshwe kuyo yonke imidlalo.
Uthe basebenze gadalala, bazinikela ekulolongeni lasemdlalweni.
“Sidlale sindawonye, silenhloso efanayo. Iligi iphela ngoMgqibelo njalo ngilokujabula ekuthini isizini le isihambele kuhle, kasizange siphanjaniswe yilutho.
“Kube yisizini elethe isimanga kithi ngoba iRea Vaya isizadlala kuDivision One, okutshengisa ukuthi abadlali labaqeqetshi lamalunga wonke asebenze ngokuzimisela ukuthi sifike la. Ngihalalisela abadlali kakhulukazi. Siyilindele iDivision One,” kutsho uNdlovu.
Kusenjalo, URumbidzai Matambanadzo oweDube Strikers ukhulume ngokuqhubekela phambili kweqembu lakhe elingene kuligi licathula. Ubonge iqembu lakhe ngokuzimisela kanye lokuthuthuka.
IDube Strikers iqede ukunombolo yesine kuligi le ebilamaqembu ayisikhombisa.
“Akuzange kube ngumgwaqo olula, abanye abadlali bahambile saqoqa abadlali abatsha abagcine iqembu limile. Ngiyambonga umqeqetshi wethu uThembumenzi Sibanda, ukuzinikela kwakhe kukhuthaze amantombazana ukuthi aqhubekele phambili,” kutsho uMatambanadzo.
Isimo selogu:
Team P W D L F A D Pts.
Rea Vaya 11 10 1 0 57 5 52 31
Mposa 11 7 3 1 44 10 34 24
Streetset 11 6 1 4 25 21 4 19
Dube Strikers 11 5 0 6 10 20 -10 15
Byo Galaxy 11 4 1 6 14 13 1 13
Fmsa 12 4 0 8 14 19 -5 12
Queen Lozikeyi 11 0 0 11 7 83 -76 0
