uMthunywa
UKUYA emthethwandaba okwenziwa liqembu leHerentals sekudale ukuthi inhlanganiso yePremier Soccer League ilixotshe kuligi ephakemeyo.
Iqembu leli kuzamele libhadale i$100 000 kuPSL.
Lokhu kutsho ukuba lomnikazi wethimu le u-Innocent Benza uzaqedisela imidlalo yakhe ezikwakweni zika-Division One kulisizini. UBenza lo, oleminyaka engu-47, uphinda abengumdlali eqenjini lakhe.
Udaba lolu lubeyisimanga kubalandeli bendaba zebhola lenyawo nanko phela luze ngemva kwamalanga ambalwa nje kubikwa ukuthi iqembu leli alisoze likhitshwe.
Icala le-Herentals yikuthi lephule umthetho wenguqu ovalela amaqembu ukuthi atshutshise indaba zomdlalo emthethwandaba. Iqembu leli ligijimele eHigh Court lizama ukuvala ukuthi kumele lichaze icala lalo lokuthi “lafumbathisa” iBlack Rhinos imali ngesizini edluleyo.
Isimanga, iHerentals yesula ukumangala kwayo eHigh Court ngoba iqula lezokuthethwa kwamacala ele-Zifa Appeals Committee lithe ayilacala.
“I-PSL Disciplinary Committee isixotshe iHerentals kuligi ngenxa yokuthi yahambisa udaba emthethwandaba.
“Phezulu kwalokhu, iqembu leli selijezisiwe kwathwa likhiphe i$100 000 kuhlangene lendleko zokuthethwa kwecala,” kutsho iPSL.
Kusenjalo, amaqembu amatsha kuligi le asetshelwe ukuthi ukwehluleka kwawo ukuthi abhadale imali yokuvunyelwa ukuba yingxenye yePSL awasoke aphiwe elinye ithuba.
Kumaqembu ahlaselweyo yiTennax leWhawha. Zombili bekumele zikhiphe i$208 000 linye ngalinye. Lokhu kutsho ukuba iPSL isizadlalelwa ngamaqembu alitshumi lasithupha kuphela.
