uMthunywa
Blessing Moyo
AMAPHOLISA axwayisa uzulu ukuthi abone ukuba inkomo zabo zilemitshiso yabo ukuze kubelula ukuthi izifuyo zabo zingalahleka zitholakale.
Isikhulumi samapholisa esabelweni seMidlands uInspector Emmanuel Mahoko uthe i-personal branding ibalulekile kakhulu ngoba yenza umlimi enelise ukudinga izifuyo zakhe abuye azithole zingacatsha.
“I-personal branding ngumtshiso olebizo lomnikazi wenkomo. Umtshiso lo, utshiyene lowesigaba ngakho lokhu kwenza kubelula ukuba isifuyo lesi sitholakale ngoba siyabe silebizo lomnikazi waso.
“Okunye okuqakathekileyo ngomtshiso lowu yikuthi umlimi engafaka owakhe umtshiso aphinde afake umtshiso wesigaba oweVeterinary Services ofakwa kumhlubulo wesandleni senxele,” kuchaza uInsp Mahoko.
uInspector Emanuel Mahoko
Uqhubekele phambili echaza ukuthi umlimi engathenga inkomo kumnikazi kumele adwebe umzila phezulu komtshiso we-personal branding womnikazi wenkomo athenge kuye abe sefaka owakhe umtshiso eceleni.
“Umfuyi engathenga isifuyo akulunganga ukuthi afake umtshiso wakhe phezulu kwalowu okhona ngoba kucina kungasakhanyi, kumele adwebe umzila phezulu otshengisa ukucitsha abesefaka owakhe umtshiso eceleni.”
Uphethe ngokuthi zikhona indlela umlimi angazisebenzisa ukuze enqabele ukutshontshwa kwezifuyo zakhe.
“Ukuhlala ubala izifuyo zakho kuyasiza ukuthi umlimi enelise ukunanzelela masinyane nxa esinye sezifuyo zakhe sesilahlekile,” nguInsp Mahoko lowo.
