uMthunywa
UHLOBO lwegcikwane leCovid-19 olwe-omicron kubikwa yilo olubangela izimfa ezinengi eziphathelane lobhubhane lolu.
UDokotela Agnes Mahomva ongu-Chief Co-ordinator weCovid-19 ehofisini kaMongameli welizwe kanye lakuKhabhinethi, uthi ucwaningo olwenziwa zingcitshi zezempilakahle luveze ukuthi ukufa kwabantu abanengi kulezinsuku kubangelwa yi-omicron variant.
I-omicron kubikwa ukuthi esabalala ngendlela emangalisayo, yaqala ukubonakala eZimbabwe kunyanga kaMpalakazi, yabangela ukumemetheka kobhubhane lolu okwesine (fourth wave) ngesikhathi sekhefu leKhisimusi lomnyaka omutsha.
Ucwaningo olwenziwa nguHulumende luveze ukuthi i-omicron variant imemetheka kakhulu ukwedlula i-delta variant eyabangela ukumemetheka kwehlandla lesibili lobhubhane lolu (second wave) kunyanga kaMpalakazi 2020.
Abantu abafika 60 babhubha kubangelwa lubhubhane lolu. Phakathi kuka 20 Zibandlela 2021 lo 3 Zibandlela 2022 nxa kuqathaniswa labantu 73 abafa ngasikhathi sinye lapho okwamemetheka ihlandla lesibili lobhubhane lolu elabangelwa yi-delta variant.
“Ososayensi baqhubekela phambili besenza ucwaningo lokudingisisa ukuthi yiluphi uhlobo lwe Covid oluhlasela abantu kakhulu.
“Ekwenzeni ucwaningo lolu ososayensi bethu bafumana ukuthi ingxenye yaantu abanengi babulawa yi-omicron variant,” utsho njalo uDkt Mahomva.
Uthe ilizwe leZimbabwe lihlezi lilungele eminye imihlobo yeCovid-19 efana le-Flurona leIHU esezabonakala kwamanye amazwe.
Uthe loba kunjalo izizalwane zakuleli akumelanga zethuke ngoba ugatsha lwezeMpilakahle lulungiselele lwaphelela ukuthi lulwise ubhubhane lolu.
UHulumende wavuma ukuthi abantu bahlatshwe ijekiseni yesithathu njengendlela yokuqinisa amasotsha omzimba ekulwiseni umkhuhlane lo kulabo abahlatshwa akuqala ngokugcweleyo.
