uMthunywa
YiNtatheli kaMthunywa
INKAMPANI kaLoliwe eyeNational Railways of Zimbabwe (NRZ) ikhangelelwe ukuthi iphathe umkhosi walonyaka wokuhlanyela izihlahla eNRZ Museum eRaylton, koBulawayo mhlaka 4 Mpalakazi.
UMphathintambo obona ngokwenzakala kusabelo sakoBulawayo, uJudith Ncube, ukhangelelwe ukuba ngumhlonitshwa kumkhosi lo.
Isihlahla salonyaka esikhethekileyo ngumkhomo.
Inkampani yakoLoliwe yiyo ekhethwe yikhomishini yeForestry Commission of Zimbabwe ukuba iphathe umkhosi wokuhlanyela izihlahla koBulawayo ngenxa yokuzinikela kwayo kumkhankaso lo ojonge ukuthi kuhlanyelwe, kunakekelwe njalo kulondolozwe izihlahla, owaqala ngomnyaka ka1980.
Isikhulumi sakoLoliwe uNyasha Maravanyika kusitatimende uthe inkampani le iyakuzwisisa ukuqakatheka kwezihlahla kanye lokubaluleka kokuthi kuhlanyelwe izihlahla.
“NjengeNRZ siyakubona ukuqakatheka kwezihlahla njalo sikhankasela ukuba iganga lilondolozwe ngoba lathi siyazidinga izigodo ezisetshenziswa ekulungiseni isipolo sezitimela.
Indikimba yomkhosi wokuhlanyelwa kwezihlahla yalonyaka ithi: “Fruit Trees for Food Security and Nutrition.”
Umkhankaso wokuhlanyelwa kwezihlahla wenziwa minyaka yonke ngoMgqibelo wokuqala wenyanga kaMpalakazi njalo waqalwa nguHulumende ngenhloso yokulwisa ukuganyulwa kwezihlahla.
