YiNtatheli kaMthunywa
INHLANGANISO yabaphathi bezikolo iNational Association of Secondary School Heads, iNash, isilinde ngamehlo abomvu ukuthola imvumo yokuthi abantwana baqale ukuncintisana kumidlalo etshiyeneyo.
Lokhu kuza ngemva kokuthi uHulumende evumele ukuqhubeka kwezemidlalo kulabo abancintisa kubanga aphezulu. Imidlalo efana lokugijima, inguqu, i-chess, i-volleyball, i-basketball aselungiselela ukuqala imincintiswano.
Besekungumnyaka ogcweleyo inkundla zokudlalela zavalwa ngenxa yeCovid-19.
Loba izikolo zilamaviki ambalwa zivuliwe, abaqeqetshi lababalisi sebedinga amaqhinga wokuthi bancenge uHulumende avumele labantwana ukuthi baphindele enkundleni.
Inhlanganiso yeNash yiyo eqhuba inhlelo zemincintiswano zemidlalo etshiyeneyo ezikolo.
Okunye njalo osekukhathaze izikolo yikuba imidlalo iyingxenye ye-curriculum entsha eqakathekisa ezemidlalo njengemfundo. Umongameli weNash, uArthur Maphosa wazise iphephandaba likazulu ukuba nxa isimo sokumemetheka kwegcikwane sisehla emphakathini, kuzakuba lula ukuthi umkhankaso wokuvula inkundla ezikolo uphumelele.
Uthe kukho konke abakwenzayo, baxoxisana logatsha lwezemfundo lokulandela izixwayiso zikaHulumende labezempilakahle.
“Ukuqala kwemidlalo ezikolo kulindwe ngabanengi sibili. Abantwana batshisekela ukuncintisana betshengisele ngamathalenta abo. Kodwa ngenxa yesimo esikuso, angeke sikutsho ngokuzethemba ukuthi inkundla zingavulwa kusiphi isikhathi,“ kutsho uMaphosa.
Kuthemu yakuqala yezikolo, abafundi bancintisana kumidlalo ebalisa eyokugijima, okuyikho okuvela ithalenta elikhethwa ukuthi liyemela isizwe.