uMthunywa
Mandla Moyo
KULIMPELAVIKI indlela ziqonde enkundleni zeligi yeBulawayo Social Soccer League (BSSL) lapho inengi labandeli eliqophe ukubukela umdlalo omkhulu ozadibanisa iMakhandeni United le Stars FC.
Umdlalo lo uzaqala ngehola letshumi lanye ekuseni, enkundleni yeMakhandeni. Okwenza umdlalo lo ubonakale umkhulu kuleminye yikuthi kumasizini adluleyo, amaqembu la abedlala kusala kukhonona utshani.
Iqembu leMakhandeni United, elidume kakhulu enkundleni zenguqu ngebizo elithi Man U, yaziwa ngokuthi ilolaka njalo labadlali bayo balomfutho. Abagadli balo abaliphumputhi igedi ngoba baligaxa njalonje ibhola entanjeni.
Lamanye amaqembu koBulawayo Social Soccer League ayakwamukela ukuthi i-Man U iyatshisa. Kuliviki edlulileyo abadlali beMan U bavakatshele iMagwegwe Bullets bafika bathela ibhola elilodwa emabhuleni, baphindela ekhaya bephakamise umsila.
Ngasenkambeni yeStars FC isimo asijabulisi. Kuzamele ingene kulumdlalo ibophile ngoba ingangena ixega, izabhaxabulwa ngendlela ezazwisa ubuhlungu eMakhandeni. IStars ikhanya ilanga selayitshonela enkundleni nanko ayisadlali ngendlela eyayidlala ngayo emnyakeni edluleyo. Kudala kwayo yayizibhuqa zonke kuBSSL. Mhlawumbe ingavuka phezulu kweMakhandeni nxa ilolonge kakuhle phakathi kweviki.
Umqoqi wemidlalo kuBSSL uBlessing Jonga uthe amaqembu wonke angena kumidlalo yeviki lesithupha njalo bakhengelele ukuthi kube yimpelaviki enhle kuzo zonke inkundla.
“Konke kuqoqwe ngendlela efaneleyo. Silindele ukuthi amaqembu asitshengise ukudla kwamehlo kuviki lethu lesithupha kuligi,” kutsho uJonga.
Imidlalo yeBSSL, ngeviki lesithupha:
Group A: Brotherhood v Glenkara (Desert);
Edgars v Cowdray Masters (Somhlolo); Fireworks v Magwegwe Bullets (Luveve High); Zulu Chiefs v Vulavale (Marisha); Iminyela Timers v 70 Combination (Iminyela 1); Man U v Stars (Emakhandeni); Tigers v Creamtata (Mazayi); Old Timers v Fund’kulinda (Pumula North); Mthala v Patapata (Bango); FC Pirates v Makwee
(Rugby Lobengula)
GROUP B: West Comm v 94 Strivers (Induba Pry School); Congo Chiefs v Robert Sinyoka; Delta v Pelandaba (Sizinda); Khami Hydon v Nketa (Khami);
Emganwini Legends v Bombers (Food 4 Less); Wembley v Happy Valley (Lobengula Secondary); Gwabalanda v Ndola (Amakhosi); Osiphatheleni v Santos (Crescent);
Bulawayo City Traffic v Pioneer (Luveve stadium); Hyde Park v Mabuthweni (Hyde Park Shops)
Group C: Nkulumane v CIWU Legends (Phekiwe);
Shwelele v Skippers; Mex Mawaya v Wolves (Sizinda);
Emganwini Celtics v Siyabangena (Food 4 Less); Bangane v South Gunners (Choppies Nkulumane 11); 11 Stars v Finance (Rugby Lobengula); Mayihlome v Real Shwelele; Matshobane v New Jack City (Matshobane); Luveve Stars v Zobha (Chigumira); Bombers v Real Magwegwe (Esporweni Entumbane)
