uMthunywa
YiNtatheli kaMthunywa
BANENGI abadlali benguqu asebetholakale belegcikwane leCovid-19 kulandela ukuqala kwemidlalo kumaligi aphezulu.
Umdlali wamaWarriors uKudakwashe Mahachi ngomunye okubikwa ethole umpumela yokuthi ule-coronavirus.
UMahachi kubikwa etholakale elegcikwane leCovid-19, okuyikhona okwenze wehluleka ukuya eMalawi leqembu lamaWarriors.
Kuvele kuyonale iviki ukuthi umdlali weSupersport lo wakhuthazwa ukuthi ahlale phansi, angene ku-quarantine.
Utshelwe ngempumela yokuhlolwa kwakhe iCovid-19 esalungiselela ukuthi ahlangane labanye abadlali bamaWarriors. Umdlali lo ubekhangelelwe ukuthi ayeqinisa iqembu likamqeqetshi uZdravko Logarisic kumdlalo wobungane lesizwe seMalawi ngempelaviki.
Loba kungakaphumi umbiko ovela kuMahachi leqembu lakhe le-Supersport, sekusaziwa ukuthi isizatho sokuvalelwa kwalumdlali ukuthi engasuki eSouth Africa yisimo sempumela yokuhlolwa iCovid-19.
Ukuhlolwa kukaMahachi kuza ngesikhathi iqembu leSupersport lilabo abanye abadlali ababanjwe beleCovid-19.
Kubikwa uMahachi ucetshiswe ukuthi ahlale phansi okwamalanga alitshumi.
Umkhuhlane weCovid-19 uqhamuke kakutsha emazweni lase-Europe.
Abanye abadlali okuzwakale belegcikwane nguAshely Young odlalela i-Inter Milan, uAlessandro Bastoni, uMilan Skriniar, Radha Nainggolan, Ionut Radu loRoberto Gagliardini.
